سَطْوَةْ الْجَوْر

ما بين لَيْل الوَجْد وِمْجَابه النُّوْر

يحِيْط بَرْزَخْ فِيْه مليون ضِيْقه

أترجمه بَرْزَخْ أو حْجاب أو سور

أو انهيار إنسان ضَيَّعْ طريقه

لكن شاهدنا.. تبَاريح مَقْهور

لقى القلم مِثْل الرّفيق وْرفيقه

ينادِمِهْ كِلْ ما الوجَعْ سَجَّل حْضور

أوْ يِزْهَمِه كِلْ ما ظروفه تعِيْقه

يِذِيْع ذَنْب وْ شَيّ بالأمْس مستور

وفي تالي الوِجْهه تجَلّى برِيقه

مشاهِد ٍ فيها الفِكِر لاعبٍ دور

حسبتها نامَت وهي مِسْتِفِيْقه..!!

واللَّى قَسَمْ بـ(العَصْر) و(التِّيْن) و(الطُّوْر)

أيْضَاً وخَرَّتْ له جِبَاهْ الخليقه

إنّ الرضى نعمه رَغَمْ سَطْوَة الجَوْر

وانا احْمِدِه في الثَّانيه والدّقيقه

صحيح بَعْض الخَلْق لو قِيْل مَعْذُوْر

يسوق عِذْر ٍ سامعه ما يطيقه

شَرَى الّذي لا من كِتَبْ بَيْت مَكْسُوْر

يثبت خَطَا الإمْلا ويخفي الحقيقه..!!