تَعَالْ دَفِّيْ خافقي وِاشْعِلْ مِنْ اللَّهفه شموع

تَعَالْ وِامْسَحْ عَ الْجِفِنْ اللَّى بِكَتْ عَيْنِهْ تبيك

يا وَحْشَةْ أيَّامْ الْبِعِدْ قِلْ لي مِتَى وَقْت الرجوع؟

كَمْ عام قِدْ لِيْ أْنْتِظِرْ وِالْوَقْت يِمْنَعْنِيْ أجِيْك

كَمّ باتت عْيوني تهِلّ فْـ.. وِسْط سِجَّادَةْ خِشُوْع

تَبْكِيْ تجود وْتَبْتِهِلْ وِعْروق صَدْرِيْ تَحْتِرِيْك

مِتَى تِجِيْ نِسْمَعْ بَعَضْ؟ نَحْكِيْ سِوَالِيْف الضِّلوع

نِزْرَعْ أمَلْ.. نِجْنِيْ لِقَا.. تِصْبَحْ حِضِنْ.. وَابْكِيْ عَلَيْك

لو كان بِيْدَيْنِيْ وَصِلْ مَا شِفْت لِلْغَيْبه شِرُوْع

ولو كان لِلْغَيْبه قَلِبْ كان اجْمَعَتْ إيْدِيْ بْيِدَيْك

قُمْ نَاظِرْ بْوِسْط الصَّدِرْ تِلْقَى طِفِلْ يَكْسِيْه رَوْع

إسْمه أمَلْ.. عمره ألَمْ.. وْاوْصَافْ شَكْله تَحْتِوِيْك

من يوم ما هو مِنْوِلِدْ حَتَّى بَلَغْ سِنّ الطِّلُوْع

مَا يوم مَرّ إلاَّ وْكِبَرْ والشَّوْق يِتْزَايَدْ إلَيْك

يِصْرَخْ ألَمْ.. يِشْهَقْ وَلَهْ.. يِرْضَعْ شِقَا.. وِيْصِيْح جُوْع..!!

مَا يِوم فَكَّرْ يِنْفِطِمْ إلاَّ بضَمَّةْ رَاحِتَيْك

تَعَالْ قَمِّطْ هَالطِّفِلْ وِاكْسِرْ مجاديف الدِّمُوْع

تَعَالْ طَمِّنْ هَالْعِمِرْ قِلْ لِهْ مِتَى رَاحْ ألْتِقِيْك

تَعَالْ حِطْ رَاسِكْ هِنَا.. باسَمِّعِكْ صَوْت الضِّلُوْع

بَاسَمِّعِكْ صَوْت الأسَى يَعْصِرْ أمَلْ مَنْ يِهْتِوِيْك

يَكْفِيْ بِعِدْ.. يَكْفي ألَمْ.. يَكْفِي شِقَا.. يكْفِي جزوع

يَكْفِيْ أشوف الكون إنْتِهْ والبشَرْ تِذْكَارْ فِيْك

تَعَالْ وِاتْرِكْ كِلّ شَيّ وِاحْيِيْ بِقَايَا هَالشِّمُوْع

تَعَال طَفِّيْ لَهْفِتِيْ (الله يِرْحَمْ وَالِدَيْك)