الإمَارَاتْ

يَا (الإمَارَاتْ) يَا شَمْس ٍ تِزِفّ السَّلاَمْ

يَا سَلاَم ٍ عَلَى طرْف النَّهَارْ انْتِثَرْ

يَا (الإمَارَاتْ) يَا طِفْل ٍ يِطَيِّرْ حَمَامْ

يَا ضحوكه مِثِلْ ضِحْك الطِّفِلْ لِلْمِطَرْ

يَا (الإمَارَاتْ) يَا شِعْر ٍ عَلَى الجفن غَامْ

أشْرِقَتْ شَمْس فِيْ مغْنَاهْ وْغَنَّى قمَرْ

يَا أغَانِيْ بَنَاتْ الْبَدو شَافَنْ غمَامْ

يا مَغَانِيْ الْمطَرْ هَتَّانْ يَوْم انْهِمَرْ

يَا (الإمَارَاتْ) يَا عَذْبه تِصُوْغ الْكَلاَمْ

مِثل صَوْغ الْمَعَنَّى الشِّعْر لَمَّا سَهَرْ

صِبْحَهَا مِثل مَا يِلْبَسْ رِجَال ٍ كِرَامْ

ثَوْب عِز ٍ عَلَى الْعَلْيَا طِوِيْل الْفَخَرْ

يَا بِلاَدِيْ (صِبَاحْ الْخَيْر) صِبْحِكْ سَلاَمْ

يَا (الإِمَارَاتْ) يَا قَلْب ٍ يِلِمّ الْبِشَرْ