يا صباح الْوَرْد يَا طَلَّةْ النُّوْر وْضِيَاهْ

يَا زَهَرْ فَوَّاحْ يَا بَيْلِسَانْ وْعَنْبره

يَا نِضَارَةْ لَمْعَةْ الشَّمْس فِيْ الكَوْن وْسِمَاهْ

يا قصيدة شَاعِر ٍ يَكْتِبْ الشِّعْر أكْثَره

ضِمِّنِيْ بِعْيُوْنِكْ اللَّى نوَافِذْ لِلْحياه

وْحِطِّنِيْ فِيْ بَالِكْ اللَّى حِفَظْنِيْ دَفْتَره

إنْتِشِرْ مِثْل السِّحَايِبْ عَلَى رُوْس السَّرَاه

وِانْهِمِرْ مِثْل الْمِطَرْ وِانْتِعِشْ مِثْل اشْجَره

يا صبَاِحيْ يا شروقي مَعَ كِلّ اتِّجَاه

عِطْرِكْ الفَوَّاحْ ضَمّ الصِّبَاحْ وْعَطَّره

آتِخَيَّلْ ضِحْكِتِكْ قَبْل أشِدّ الإنْتِبَاهْ

وَانْتِبِهْ وَاسْمَعْ صِدَى الصَّوْت عُوْد وْمبْخَره

أنْثِرْ (الأوْركِيْد) فِيْ سِكَّةْ الْحِبّ وْغَلاه

وْيَرْقِصْ (التَّوْلِيْب) وِيْحِقّ لِكْ يا مَفْخَره

يَعْزِفْ (النَّرْجِسْ) لحونه وْيَهْدِيْ لِكْ شِذَاهْ

قَبْل وَرْد (الإقْحوانه) يبَادِلْك ثْمَره

وِيْتِفَتَّقْ لِكْ شِذَا الْوَرْد وِيْعَانِقْ صِبَاهْ

يَا غلاي اللَّى غَرَامه بصِدْقه يَعْمره

أعْشَقِكْ يَا صِبْحِيْ الأوَّلْ لِيَا مِنْتَهَاهْ

وَاتمادى لِكْ هوَى وِالْغَلا مَنْ يقْدَره