سِرّ السِّتِرْ

يَا مْغَرِّب ٍ بِالشّوْح يَمْنَاكْ

هَيِّدْ تِمَهَّلْ رِيْض مِرْجِيْك

وِايْلا سِكَنْت... إصغي لِيْ إذْنَاك

وانْصِتْ لِقَوْل مْحِبّ مِغْلِيْك

تْرَى لِسَانْ الْعَقِلْ يِثْناكْ

اوْزِنْ كَلامٍ قَبْل يَحْفِيْك

إنْ جَتْك عَوْيَا مِمَّنْ أدْناكْ

إرْجَعْ لامِرْ مِنْ هُوْ مَعَالِيْك

وادْفَعْ بِهَا الْحَسْنَى جِدَى شْنَاكْ

الْمَايْ يَطْفِيْ نَارْ مِشْنِيْك

خَللَّكْ بِشُوْش الْوَجْه لِعْنَاك

رَحِّبْ بِمِنْ جَدَّى مَلافِيْك

إكْظِمْ عَلَى جَرْحِكْ وْمِضْنَاكْ

حَيْذُوْر تَبْدِيْ له بِمَا فِيْك

السِّرّ سِتْر الْغَيْر بِكْنَاكْ

إيَّاكْ تَبْدِيْ سِرّ عَاطِيْك

وِاعْلَمْ بِأنّ الزَّادْ لَوْ هْنَاكْ

كَانِهْ حَرَام ٍ كَيْف يَهْنِيْك

وِارْضَى بْمَا بْحَوْزَتْك تِغْنَاك

نَفْسٍ قنوعه عَادْ تَغْنِيْك

وَايْقِنْ بِأنّ الرَّبْ بِحْنَاكْ

عَالِمْ خِفَايَا سْعِيْد مِنْجِيْك