الْبِنْت مَظْلُومه تِعَانِيْ وْتِعَانِيْ

بَعْد الدّراسه وِالتَّعَبْ (جامعيِّهْ)

 

تَاخِذْ وِظِيْفه بَعْد صَبْر وْتِفَانِيِ

تِتْحَمَّلْ وْتِقْبَلْ ظِرُوْف وْأسِيِّهْ

 

مَعْ عَقْلها تَرْسِمْ حِرُوْف وْمَعَانِيْ

وِتْقُوْل فَارِسْهَا صِفَاتِهْ غِنِيِّهْ

 

وِالثَّوْب الابْيَضْ حِلْمَهَا فِيْ الزّمَانِيْ

فِيْ لَيْلِةٍ قَمْرَا جميله وْثرِيِّهْ

 

لكن مَعْ الايَّامْ وِالْعِمِرْ فَانِيْ

تِذْبَلْ كَمَا وَرْدِهْ وِسِطْ مَزْهَرِيِّهْ

 

وِالْفَارِسْ اللَّى كَانْ نَبْض الْحَنَانِيْ

رَاحْ وْتِزَوَّجْ بِالْخِفَا (أجْنِبِيِّهْ)

 

جَايِزْ تِكَالِيْف الْمَهَرْ شَيْ فْلاَنِيْ

يَمْكِنْ مِنْ الإسْرَافْ صَارَتْ قِوِيِّهْ

 

لكن بَنَاتْ الدَّارْ قَدْرٍ وْشَانِيْ

مَا عِمْرَهَا كَانَتْ رخيصه وْرِدِيِّهْ

 

فِيْ حَزَّةْ الشِّدَّاتْ شَادَتْ مِبَانِيْ

فِيْ الْمِجْتَمَعْ تَبْنِيْ وْتِبْقَى وِفِيِّهْ

 

بِنْت (الإمَارَاتْ) الأصِيْلِهْ وِلاَنِيْ

أمْدَحْ عَلَى شَانْ الأصِلْ وِالْحِمِيِّهْ

 

أحْنَا بَنَاتْ الدَّارْ فَخْر الزّمَانِيْ

فِيْنَا صِفَاتْ الْجُوْد بِنْت عْرِبِيِّهْ

 

لا تَظْلمون الْبِنْت مَا هِيْ أغَانِيْ

تِضْحَكْ عَلَيْهَا وْتِنْتِقِدْهَا ضِحِيِّهْ

 

الْبِنْت تِبْقَى الرُّوْح فِيْ كِلْ مكاني

وِالرِّزْق مِنْ رَبْهَا وْتِحْيَا رِضِيِّهْ

 

لا تْقارنون الشَّمْس بِالشَّمْعِدَانِيْ

أهْدِيْ بَنَاتْ الدَّارْ أجْمَلْ تحَيِّهْ