لَوْ كَانْ بِيْدِيْ مَا كِتَمْت أنْفَاسِهْ
ذَاكْ الشِّعُوْر اللَّى أحِسِّهْ فِيْنِيْ
يِلْعَبْ بِيْ الشَّوْق الْخِفِيْ بِاحْسَاسِهْ
وَاحِسّ بِاحْسَاسْ الْغَلا يَحْوِيْنِيْ
أشْعِرْ بِتَأثِيْرِهْ وْقُوَّةْ بَاسِهْ
شِعُوْر عَنْ كِلّ الْبِشَرْ يَغْنِيْنِيْ..!
حَرَّكْ مِشَاعِرْ خَاطِرِيْ الْحَسَّاسِهْ
وْبَدَّدْ دِمُوْع ٍ حَايِره فِيْ عَيْنِيْ..!
وَابْعَدْ وِسَاوِسْ صَدْرِيْ وْخَنَّاسِهْ
وْدَاوَى جِرُوْح ٍ مِنْ زِمَنْ تَكْوِيْنِيْ..!
وَاحْيَا الْهِشِيْم اللَّى ذِبَحْنِيْ يْبَاسِهْ
فِيْ دَاخِلِيْ مِنْ مَاضِيَاتْ سْنِيْنِيْ
سَبْعٍ عِجَافْ تْهِدّ صَرْح ٍ سَاسِهْ
وَاصْبَحْ حِطامه ذاكِره تَشْقِيْنِيْ..!
أعْتَبْ عَلَى مَنْ بَاعْ قَلْبِيْ وْدَاسِهْ
وْمِنْ كَاسْ هَجْرِهْ دَايِم ٍ يَسْقِيْنِيْ
لكنّ قَلْبِيْ مَا يِصِدْ عَنْ نَاسِهْ
مَهْمَا اجْرِمَوْا فِيْ حَقِّهْ مْحِبِّيْنِيْ..!
مَمْنُوْن.. وَ آدَوِّنْ لِهْ بْكِرَّاسِهْ
ذِكْرَى جِرَاحِهْ.. عِنْدِيْ تْسَلِّيْنِيْ..!
وْيَا ذَا الشِّعُوْر اللَّى كِتَمْت أنْفَاسِهْ
أرْجُوْك عَنْ طِرْق الْخطا تَعْفِيْنِيْ