مَرَّيْت ذاَتْ الطِّرِيْق.. اللَّى حِفَظْتِهْ مَعِهْ
وْلِقَيْتها وافيه.. لَوْحَتْه.. وِحْجَارِتِهْ
نَفْس الرِّصِيْف الّذي دَوَّرْ لِبَوْحِيْ سِعِهْ
اللَّى عَلَى نَبْرِتِهْ.. يَامَا الخُطَى سَارِتِهْ
مَرَّيْت كَنِّيْ مِسَافِرْ.. خَانِتِهْ الأشْرِعِهْ
مَا اخْتَارْ هذيْ الْجِهَاتْ وْلاَ هِيْ اخْتَارِتِهْ
وِحِيْد.. وِالذِّكْرِيَاتْ بْغَيْبِتِهْ.. مُوْجِعِهْ
مَا جِيْت شِبَّاكْ إِلاَّ.. يِفْتَحْ سْتَارِتِهْ..!!
هِنَا دَهَمْنِيْ الْمِطَرْ.. قَبْل الْوِطَى يصْرَعِهْ
وِهْنَاكْ طَوَّلْ يِحَدِّثْنِيْ.. عَنْ إسْوَارِتِهْ
يَا صَاحِبِيْ وِالسِّفَرْ وَجْه وْذِكِرْه أمْتِعِهْ
وِالضِّيْق حَادِيْ.. وْيَعْزِفْنِيْ بِقِيْثَارِتِهْ
كِلِّيْ وِجَعْ وَيْن مَا نَاظَرْ وْحَطّ أصْبِعِهْ
كَبَّرْ قَبِلْ مَا يِشِنّ.. بْلَيْلِتِيْ.. غَارِتِهْ
وِالْمِدْمَعْ اللَّى بِكَى.. كِلِّهْ لاَجِلْ مِدْمَعِهْ
اللَّى غَرَفْتِهْ وْ هُوْ.. يَا كِثْر.. بَحَّارِتِهْ
وَدَّعْت دَرْبه.. وَانَا مَا قِلْت بَاوَدِّعِهْ
يِقْطَعْ أبُوْ الْحَظّ.. وَادْوَاره وْدُوَّارِتِهْ
أمَّلْت وِالْيَاسْ بَابْ.. الطَّرْق مَا يِسْمَعِهْ
وْلاَ نِلْت غَيْر الْحِزِنْ.. فِيْ وِسْط مَحَّارِتِهْ
يا اللَّى ظِمَيْتِكْ شِعِرْ وِشْ يَمْطِرِكْ وَاسْجَعِهْ
كِلّ الأغَانِيْ.. وِجَعْ.. لِلْوَادِيْ وْجَارِتِهْ
تِعِبْت والْبَالْ.. كَفَّيْن الْمِسَا.. تِصْفَعه
وْلا طَيَّرْ الضِّيْق جِنْحَانِيْ وْلاَ طَارِتِهْ..!
وْتِعِبْت وِالطِّيْب ذَنْب وْكَدِّرَوْا مِهْجَعِهْ
وْلا عَادْ لِلذِّنْب خِلْق وْ لا لِكِفَّارِتِهْ
وْتِعِبْت وَانَا وَجِهْ وَاحِدْ.. وْ جَوْه أقْنِعِهْ!!
بِسِيْط.. مَا جِيْت.. لِلْمِصْبَاحْ وِمْغَارِتِهْ
مَرَّيْت ذَاتْ الطِّرِيْق اللَّى تَرَكْتِهْ.. مَعِهْ
مَعَايْ وَافِيْ بِقَى.. لَوْحَتْه وِحْجَارِتِهْ..!