لابِسْ الْغَيْمِهْ وَانَا قَلْبِيْ رِعُوْد
يَوْم أشُوْفِكْ بَيْن ذِرْعَانْ السِّحَابْ
أنْهِمِرْ غِيْرِهْ عَلَيْك بْلا حِدُوْد
كِلّ مَا تَبْرِقْ ثَنَايَاكْ الْعِذَابْ
إبْتِسَامِكْ شَهْد.. وَانْفَاسِك وِرُوْد
وْبَحِّتِكْ سِكَّرْ.. وْمَنْطُوْقِكْ عَذَابْ
كَنِّكْ إِلاَّ النَّوْد مِنْ فَوْق النِّفُوْد
وِالْقُمَرْ وِاللَّيْل فِيْ عِزّ الشّبَابْ
دِهْن عُوْد.. وْعُوْد فِيْ عَيْن الْحِسُوْد
وِالنِّسَايِمْ لِكْ مَنَادِيْب وْثِيَابْ
مِنْ كِثِرْ مَا فِيْك مِنْ عِطْر الْوِجُوْد
مِقْتِفِنِّكْ مِنْ عَلَى صَهْوَةْ سَرَابْ..!
دَنّ عَيْنِكْ مِنْ زِمَنْ (عَادْ وْثَمُوْد)
مَا بَعَدْ شِرْبه مَلاَمْ وْ لا حِسَابْ
بِنّ مِنْ مِثْعَابْ عِكْف أهْدَابْ.. سُوْد
لِهْ شِقَارْ الْخَيْل وَافْعَالْ الشَّرَابْ..!
زِدّ كِلّ النِّاسْ نَقْصِكْ فِيْه زَوْد..!!
جَلّ مِنْ سَوَّاكْ تِبْرٍ مِنْ تِرَابْ..!
صَدِرْ ثَامِرْ وِالْخَصِرْ ضَامِرْ..! جِحُوْد..!
وْعَجْز عَنْ أصْل الْجِسَدْ فِيْه اغْتِرَابْ..!!
الْجَمَالْ بْغَيْبِتِكْ مَا لِهْ وِجُوْد..!!
يَحْضِرْ بْحَضْرَتْك وِالاَّ انْ غِبْت غَابْ