أحْبَابي اللَّى غِيَابْ طْيوفهم ظَلْمَا
أحْرِِسْ نَهَرْ وَصْلهم وانا بحاجة مَا..!!
أحِنّ واشتاقهم وَاوْلَهْ واناديهم
وِالَّلى بِقَى لي من الذِّكْرى وَرَقْ واسْمَا..!!
ما ادري نسوني أوْ انّ الْوَقْت نَسَّاهُمْ..!!
والاَّ قلوب البشَر باحساسهم تِعْمَى..؟!
لا تسألوني عن دْموعي وعن صَمْتي
رُوْحوا اسْألوا الحِزِنْ عَنِّي واسْألوا سَلْمَى
ولا تسألوني عَلَيْهم وَيْنهم ما ادري..!!
مُرّ الإجابه يجَدِّدْ جَرْحِيْ الأدْمَى
بَانْزِفْ مشاعِر تِبَلِّلْ جَرْحي الظَّاهر
وْبَانْثِرْ حنيني على أوْرَاقي الْبَلْمَا
يمْكِنْ قصيدي يوَصِّلْ صَوْتي وْيمْكِنْ
بَعْض القصايد تظِلّ تْعَانِقْ الظَّلْمَا
ظروف الايَّام حَدَّتْ خافقي يصْرَخ
وِطْعون الاحْباب خَلَّتْ ضِيْقتي بَكْمَاْ
صَوَّبْني الحزن في صدري وجا مَقْتَلْ
وِالَّلى مَعه طهر قلبي كيف لو يرمى..؟!
يا وَجْد حالي على حالي وانَا لْحَالي
كِلْمَا اتِذَكَّرْ سِنِيْن ٍمَرَّتْ.. وْكِلْمَا
يمرّ في بَالْ قَلْبي من ذِبَحْ قَلْبي
بْخَنْجَرْ غْيَابْ لا كَبَّرْ وْلا سَمَّى
وْمَهْمَا يطَوِّلْ جفاهم.. بِعْدهم والصَّدّ
تِبْقَى المشاعِر ما بين ضْلوعي الأسْمَى