وَلَّى النَّهَارْ، وْفَزّ لَيْل الدَّانْ
والنِّسْمه تْسَوْلِفْ بعَفْوِيّه
قَفْرَا المدينه وِانْ بِهَا سِكَّانْ
مَا كِلّ أرْض ٍ تُعْتَبَرْ حَيّه..!!
مِتْمَسِّكْ بْصَمْتِيْ قَدِرْ اْلاِمْكَانْ
وِالْخَوْف صُوْره غَيْر شِعْرِيّه
أمْشِيْ وَرَا الحاجه.. خُطَايْ ألْحَانْ
الْمَشْي لِلْمَسْجُوْن: حِرِّيّه..!
يَا شَوْق.. لي خَلْف الجفاف أزْمَانْ
يِتْزَوَّجْ الإرباك بِايْدَيّه
مِثْلِكْ نَهَرْ جاري، وَانَا بُسْتَانْ
حَرَامْ أجِفّ وْمُنْيِتِيْ (مَيّه)..!
سِيْلي عَبَثْ كِلّ الْجِهَاتْ أخْوَانْ
بَرْد: انْتِظَارِكْ، وِاْلجِفَا: كَيّه
سِيْلي عَبَثْ مِا لِلنِّدَمْ عِنْوانْ
لا صِحْت.. وْ رَدّ الصَّوْت مَرْثِيّه..!
لِكْ تسْقِطْ حْروفي وَرَقْ رُمَّانْ
وِالْبَالْ يِرْقى الرِّيْح قُمْرِيِّهْ
مَا هُوْ بْيَدِيْ، لَوْ بيِدَيِّهْ.. كان:
خَلَقـْت قِصَّةْ عِشْق مَرْوِيِّهْ
الصَّبْر مَوْت..! الصَّبِرْ لاَ مِنْ خَانْ..
أسْرِيْ لدَرْب ٍ رَوْحِتِهْ، جَيّه..!
خَوْف اْنصِدِمْ فِيْ وِحْدِتِيْ: جِدْرَانْ
من هو يخاف اليوم.. من زيّه..؟
حَانْ انْسِحَابِيْ وِالْهَرَبْ قِدْ حَانْ
شَمْس ٍ تقِصّ خْيوطها الفَيِّهْ
وِاذَا سْألَوْك النَّاسْ وَيْن فْلاَنْ؟:
قُوْلِيْ عِشِيْق ٍ وِاهْتِدَى فْـ.. غَيّه..!