تَحْسِبْ وْأحْسِبْ بِالدِّقِيْقِهْ

وِالْعِمِرْ يِحْسَبْ بالدِّقَايِقْ

إِذْهَنْ لِقَوْل ٍمَا يِطِيْقِهْ

غَيْر الّذِيْ لِهْ عِلْم فَايِقْ

مَنْ يَغْرِفْ بْيَمْنَىً يِلِيْقِهْ

شِرْب الْعِدَفْ وِانْ كَانْ رَايِقْ

خَلِّكْ عَلى جَدّ الحقيقه

وِاقْبَضْ دروب الْخَيْر سَايِقْ

لا تَفْتِنِكْ دِنْيَاً شِفِيْقِهْ

وِتْقُوْل عِزِّيْ فِيْ لَحَايِقْ

لَوْ دَامَتْ لْغِيْرِكْ طِرِيْقه

مَا نِلْت مِنْهَا شَيّ لاَيِقْ

جَدِّمْ لْيوْمِكْ بالوثيقه

يَوْم ٍبها جَمْع الْخِلايِقْ

إنْزِهْ لسانك عَنْ صِلِيْقه

لا تِدِّعِيْ وِتْقُوْل فَايِقْ

الرَّبّ يِعْلَمْ وِشْ خفيقه

قَلْبِكْ وْمَا تَحْوِيْ الخفايق

إحْذَرْ مِنْ يْمِيْن ٍمِحِيْقه

تَرْدِيْك فِيْ قَعْر الْمَحَايِقْ

واحْذِرْك عَنْ تَبْع العليقه

يَلْحِقْك مِنْ تَبْعه عُوَايِقْ

لا تِقٌطَعْ الْحَبْل وْوِثِيْقهْ

أنْصَاكْ عَنْ قَطْع الرِّفَايقْ

تُوْثَمْ وْتِخْسَرْ مَا تِطِيْقه

تَاخِذْ جِزَا مَا كِنْت حَايِقْ

تَحْسِبْ وْأحْسِبْ بِالدِّقيقه

وِالْعِمِرْ يِحْسَبْ بِالدِّقَايِقْ