إنْدِفَعْت بْكِلّ وِجْداني وْحَبَّيْتِكْ

وِانْت كِلّ الأمَانِيْ وِانْت وِجْدَانِيْ

فِيْ الْجِمِيْلاَتْ مِخْتَارْ وْ تِنَقَّيْتِكْ

وفي مَحَبَّتْك لَيْن آموت مِتْفَانِيْ

من شفوق الْوِدَادْ وْحِبِّكْ أغْلَيْتِكْ

في رضاك أزْعِلْ الْقَاصِيْ مَعَ الدَّانِيْ

عالي وْدَوْم عِنْدي مِرتِفِعْ صِيْتِكْ

فِيْ خِفُوْقِيْ وْفِيْ مَحْسُوْس الاذْهَانِيْ

مَرّ نِصْف الزِّمَانْ وْرَاحْ مَا جِيْتِكْ

والظِّرُوْف الشِّقِيِّهْ مِنِّكْ تْعَانِيْ..!!

كِلّ مَا جِيْت بَامِرِّكْ تعَدَّيْتِكْ..!!

صَدِّنِيْ عَنْك تَيَّار ٍ تِبَلاَّنِيْ

وْصِدْفَةْ الحَظّ مَا جَتْ بِكْ وْلاَ رَيْتِكْ

وِالرِّجَا مَا عِطَانِيْ مِنْك تِبْيَانِيْ

يا اجْمَلْ النَّاسْ بَاحْلامِيْ تِشَقْوَيْتِكْ

حِلْم يِنْتَابِنِيْ وَاوْهَامْ تِدْهَانِيْ

إخْتَلَقْ لِيْ شِعُوْر رْضَاكْ وَارْهَيْتِكْ

لَيْن شيْطَانْ حِبِّكْ جَابْ سِلْطانِيْ..!!

أنْتِمِيْ لِكْ وَلاَ واهْوَى تعَنِّيْتِكْ

في ظماك أرتوي وَامُوْت عَطْشَانِيْ

كَنّ وَصْفِكْ إلَى مِنِّيْ تِحَلَّيْتِكْ

(بِنْت نَشْوَانْ) وِالاَّ (بِنْت رَبْدَانِيْ)

مِنْ صِفَاتْ الأصَايِلْ مِنْتِسِبْ بَيْتك

أتْلَع ٍ مِنْ شِمُوْخ الْعِزّ طَرْبَانِيْ

مَايِسْ الْقَدّ في غِضَّةْ مَنَابِيْتِكْ

عُوْد مَوْزٍ عَلَى السَّاقي وْرَوْيَانِيْ