إيْه الشِّتا يا هشاشة عَظْمي وما قويت

آشِبّ ناري وانا عاري بوَجْه الصقيع

وِشْلَوْن أبَقْدَرْ وَانَا اصْلاً يا بلادي نسيت

انِّي طِفِلْ كِلّ ما يعصى جروحه يطيع

ما بين صوت المدافِعْ والقنابل بكيت

وانا من اوَّلْ حَلَمْت أقْطِفْ زهور الرّبِيْع

لِبْسِيْ كِفَنْ يا عَرَبْ ما ادْرِيْ وِشْ اللَّي جنيت

هل هي ضحيَّةْ حقيقه أوْ سياسة قطيع

يَا بَرْد خِذْنا حطَبْ جاهِزْ وْمِنْ كِلّ بَيْت

أجْسَادنا جايعه لِلْمَوْت ما نستطيع

الخوف يبني خيام التّيْه واللَّي بنيت

كومة رَمِلْ مَعْ مَهَبّ الرِّيْح تَسْقِطْ سريع

حِنَّا غَلابَى وْيَا اللَّي ما سمَعْت وْدريت

(فَتَّاكْ) قَاتِلْ وْفِعْله في بلادي شنيع

أطْفَالْ بَيْن الْحَذَرْ وِالْجُوْع قَبْل المبيت

النَّوْم مِثْل العيا لِعْيون طِفْلٍ رضيع

صَوْت الأرَامِلْ قَهَرْ يَا مَنْ بذَلْت وْعِطَيْت

شِفْهم على قارعة ذاك التِّشَرِّدْ جميع

وَيْن الْعَرَبْ وِالتَّلاحِمْ وَيْنهم ما لقيت..؟!

إسْلامنا صار جِمْله من كلام المذيع..!

أبْكي وَانَا وَاحِدْ مِنْ الآلاف مَعْهَا غديت

أشِيْل عَجْزي معي ما عاد عِنْدِيْ صنيع

تيْهٍ جَرَفْنَا معه يا طاغيه ما اسْتِحَيْت

مِنْ خَالِقِكْ لو يجِيْك الذَّنْب مِنْ كِلّ رَيْع

يا أمَّةْ الحَقّ صَوْت الشَّعْب فِيْه انتهيت

قَطَّعْ حَنَاجِرْ وْحِلْم الله علينا وسيع

يَا رَبّ هذا الدِّعَا دَمْعه وْمَعْهَا رجيت

لِطْفِكْ وْنَصْرِكْ وْعَجِّلْ بِالْفَرَجْ يا سميع

يَا رَبّ يا اللَّى عَلَى كِلّ الأكابِرْ علَيْت

سَلِّطْ على الطَّاغيه وِبْقِدْرِتِكْ يا بديع