ما عاد لي خاطِرْ وَلا عاد لِيْ نَفْس

حَتَّى يَدِيْ تِرْفَعْ في وَجْهِيْ يِدَيْهَا..!!

تعبْت أغنّي للمسا غِنْوَةْ الشَّمْس

وَاكْذِبْ عَلَى نَفْسِيْ وَامَنَّيْ عَلَيْهَا

ياما حَرَثْت وْما جَنَى كَفّي الغَرْس

كِلّ الدّروب آشوفها ما أجِيْهَا

المشكله ما جَتْ على اليوم أوْ أمْس

الِمشْكِلِهْ أرْبَعْ جِهَاتِيْ مَاْ اْبِيْهَا

خذَيْت من راس الزِّمَنْ حِكْمَةْ الحَدْس

حَبَّيْت أبَيِّنْ فِرْصِتِيْ مَا احْتِرِيْهَا

والنَّار تِذْخَرْ للصَّبِرْ نِيّة اللَّمْس

واقول يمكن بكْرَهْ الله يْهَدِيْهَا

ما شِفْت غير الصَّمْت يِتْصَنَّت الهَمْس

بَعْض السِّوالِفْ مِزْعِجِهْ فِيْ حَكِيْها

تَفْرِق مَاْ تَفْرِقْ لْــ.. هِنَا كافِيْ وْبَسّ

ما عاد باقي حاجَه.. أنْدَمْ عَلَيْهَا