كَبْوَةْ حصان

جِيْت أزورك قَصْدِيْ آسَلِّمْ عَلَيْك

مِنْك تَكْفِيْ قَوْل كِلْمَةْ (مَرْحبا)

جِيْت من ذاتي وْمِتْوَلِّهْ عَلَيْك

مَقْصِدِيْ شَوْفِكْ وْأكْثَرْ مَا أبَى

من ثلاث سْنيْن وِعْيُوْنِيْ عَلَيْك..!

وِدِّكْ بْرُوْحِيْ يا رَيْحَانِيْ رُبَى

وِانْتِهْ مْطَنِّشْ أوَنِّكْ مَا عَلَيْك..!!

لَمْحِتِكْ تَفْشِيْ خفايا مَا غِبَى

قَلْبي الَمَشْغُوْف ما يِخْفَى عَلَيْك

مِنْك يِتْرَقَّبْ تباشير النِّبَا

في هواك أبْحَرْ وْكَم جَسَّى عَلَيْك

بِكْ تَعَلَّقْ ما تَعَلَّقْ بالشِّبَا

طَيْر وِدِّيْ في الهوى يَكْسِرْ عَلَيْك

حَوْم.. وِحْصاني بمضمارك كِبَا

دَيْن لِكْ عِنْدِيْ وْدَيْن ٍ لِيْ عَلَيْك

طاح دَيْني مِنْ وِفَا دَيْنِكْ رِبَا

كِلّنا فَدْوَى وْلا يِغْلَى عَلَيْك

آمِر، تْدَلَّلْ، وْقِلْ لي وِشْ تِبَى

أخْتِصِرْ قَوْلِيْ ولا اطَوِّلْ عَلَيْك

واسْتِخِصِّكْ في نِبَا سورة (سبا)