بِنْت عِزّ

عِشْت لِكْ كِلِّيْ نِقَطْ.. تَبْغِيْ حِرُوْف..!!

وَاجْوِبِهْ مَا اسْتَوْعِبَتْهَا الأسْئِلهْ..!!

فَوْق كَتْف الْوَقْت طَوَّلْت الْوِقُوْف

لَيْن عَدَّتْنِيْ سِنِيْنِيْ هَرْوِلِهْ..!

جِيْت بَالَبِّسْك مِنْ قِطْن الْقِنُوْف

بَسّ خِفْت بْرُوْق ثَغْرِكْ تَشْعِلِهْ..!

يَوْم تِتْبَسَّمْ وَانَا أتْأمَّلْك شَوْف

فِيْ ضِلُوْعِيْ تَنْبِتْ أشْجَارْ الْوَلِهْ..!

تَاتِيْ الْهَمْسِهْ مِنْ شْفَاهِكْ هِنُوْف

مِنْ تَرَفْهَا بِنْت عِزّ مْـدَلِّــلِــهْ

أشْهَبْ الْعَنْبَرْ مِنْ أنْفَاسِكْ يِطُوْف

مِن نَهَايَاتْ الْحِدِيْث لأوَّلِهْ

كِلّ مَا مَدَّتْ لِيْ أحْلاَمِكْ كِفُوْف

أرْتِمِيْ لِكْ فِيْ يِدَيْنِكْ سِنْبِلِهْ..!

فِيْك تَرْبِطْنِيْ صِلَةْ رُوْح ٍ بِجَوْف

لاَ حَرَمْنِيْ الرَّبّ مِنْ هذِيْ الصِّلِهْ

بَدِرْ فِيْ فِسْتَانْ لَيْل ٍ مِنْ زِلُوْف

فِتْنِة ٍ قِدَّامْ عَيْنِيْ مَاثِلِهْ

إِنْ قِدَرْت تْرِدّ لِيْ قَلْب ٍ شِغُوْف

رِدّ عَنْ عَرْض الشِّمَالْ الْبُوْصِلِهْ