الشِّعِرْ وهْبه والذَّكِيْ شَرَارَةْ إبْدَاعْ وْشِعُوْر

وِاتْقَانْ زَرْع الشَّمْس لِلْمِغْبَاشْ مِنْ بَعْد الظَّلامْ

وَانَا عَلَى الْخِرْب الْخِرِيْش مْن الْمَعَانِيْ والسِّطُوْر

هَدَّيْت فِكْرٍ صَايده يَفْرِيْ الحديد مْن اللِّحَامْ

فَارِعْ نَحَرْ.. طِوِيْل عِنْق.. أقْطَمْ.. وَحَشْ.. قَلْبٍ جِسُوْر

وَافِيْ ظَهَرْ.. صَافِيْ نِظَرْ.. مَا يْلِدّ عَيْنِهْ لِلْحمام

وهنا الحمام آشَبّهه بِالْغَثّ واسفاف الأمور

وِالْفِكْره اللَّى عِقْمَهَا وَاضِحْ قَبِلْ مِسْك الْخِتَامْ

وَانَا عِزَفْت الصِّبْح وِاسْتِنْشَاقْ نَفْحَاتْ العطور

هِيَ إخْتِصَارْ إنْصَاتْ مَنْ يُوْلِيْ الشِّعِرْ جُلّ إهْتِمَامْ

لِذَا بَنَاتْ الرِّيْح لَوْ شَاشَتْ تصَخِّرْهَا صدور

صدور وِالْمِفْرَدْ صَدِرْ وِالْعَجْز يروي له حِيَامْ

وانا عَلَى بَابْ (الْغَزَلْ) طارِقْ وْلِيْ رَمْز وْمرور

الْقَلْب مِعْشِبْ وِالْوَصِلْ هَمَّالْ وِالْحِبّ الغمام

مِنْ دُوْن قَاصِرْ بِالشِّعِرْ وَاغْرَاضه اللَّى ما تبور

لكنّ مِبْطِيْ مِنْشِلِعْ قَلْبي وْلاحِقْه إنْقِسَامْ

عَلَى حديث الْمِسْك لا غَنَّى عَلَى جَمْر وْبخُوْر

اللَّى عَلَيْهَا مْن الشِّفَقْ مَسْحه ويظماها الغرام

غَيْدا تِشبَّعْ بالنّعومه لِلْحَلا فيها جذور

فِيْهَا الحرير يْذُوْب لا قَبَّلْ جِسَدْهَا ثُمّ نام

وْلِلْمِلْح والسِّكَّرْ تِوَحِّدْ فِيْ الْبِيَاضْ وْفِيْ الطهور

والثالث إطلالة مْحَيَّا دُوْنه نْمِيْط اللِّثَامْ

سَلَّفْنِي حَظِّيْ وَصْلَهَا حَوْل السِّنِهْ وَارْبَع شِهُوْر

ثُمْ بَعْدَهَا جاها جفول اللى يذَيِّرْهَا العسام

قولوا لها أنْ بَعْض الغياب اللَّى بلا سِبِّهْ دِبُوْر

لِلْفَرْحه اللَّى وَزَّعَتْنِيْ بَيْن مَكْروه وْحَرَامْ

لكن على الله يَا زِمَنْ وانا الصّبور ابن الصّبور

أرْفِيْ جروحي وَابْتِسِمْ وَاسْرِيْ تَحَتْ جِنْح الظَّلامْ