ساهره واللَّيْله الْقَمْرَا ضياها ما ارْوَعه

جَوَّهَا السَّاحِرْ خَيَالِيْ بالعيون الشَّاعِرِيِّهْ

 

تاجها بَدْر اكْتِمَلْ والنُّوْر تَوَّجْ مطْلعه

صارت الدِّنْيَا بنوره واللّيالي سَرْمِديِّهْ

 

ساهره وَاوْرَاقْ شِعْري بِالشِّجَنْ مِتْشَبّعه

وَابْتِسِمْ وِالْحِزِنْ يَشْعِلْ بِالصَّدِرْ نِيْرَانْ حَيِّهْ

 

أشْعِرْ بْحِزْن ٍ حَرَقْ لِيْ خافقي بَيْن أضْلعه

يَخْنِقْ أنْفَاسِيْ يِثُوْر الدَّمْع بِعْيُوْن ٍ شِقِيِّهْ

 

الحبيب اللَّى يغيب وْخَافقي مَا وَدَّعه

مَا يبي قَلْبي يعاني مِنْ كِثِرْ عَطْفه عَلَيِّهْ

 

مَا دَرَى انّ الرُّوْح تَسْكِنْ داخله تجري مَعَهْ

وِانْ قَلْبي وِسْط صَدْره يِنْتِفِضْ صِبْح وْعشيِّهْ

 

عِشْت بَاجْوَاءْ المدينه سِحْر مَعْه أسْتَمْتِعِهْ

بْلَيْل مَشْحون بْعواطِفْ حِبّ وَاحْلام ٍ هِنِيِّهْ

 

مَعْه أحِسّ الكون مِلْكي والنِّجُوْم مْجَمَّعه

عِقْد ألْمَاسْ وجواهر قَدّمه حِبِّيْ هديِّهْ

 

الحبيب اللَّى بعِشْقه صِرْت بِنْت مْدَلَّعه

وَاعْرِفْ انِّيْ كِنْت حِلْمه بِالْحَلا والجاذبيِّهْ

 

وَاعْرِفْ انِّيْ وِسْط قَلْبه جالسه مِتْرَبّعه

صِرْت حِبِّهْ نَبْض قَلْبِه صِرْت لِهْ رُوْح ٍ وِفِيِّهْ

 

ظاميه وِالْحِبّ صافي أشْربه مِنْ منْبعه

ما تكدِّرْه الشّكوك السُّوْد وِظْنُون ٍ غبيِّهْ

 

إيْه باحساسي تطرِّفْ قِلْ جنون مْوَلّعه

بْحِبِّهْ لْحَدّ الثّماله لَيْن تاتِيْني المنيِّهْ

 

أفْتِخِرْ بِهْ (فخر حاتم) بِالْكَرَمْ في مجمعه

وْمَا عَلَيّ مْن الْحِوَاسِدْ، مِنْ جَعَلْنِيْ لِهْ قِضِيِّهْ

 

كِنْت أسْهَرْ لِهْ وأكْتِبْ فِيْه شِعْري.. وَاسْمعه

يَرْسِمْ بْرِيْشةْ غَرَامه حِلْم يجمعنا سِوِيِّهْ

 

وْصِرْت أسْهَرْ مِنْ فراقه من جِرُوْح ٍ مُوْجعه

يَنْزِفْ الْخَفَّاقْ مِنْها دَمّ وِدْمُوْع ٍ سِخِيِّهْ

 

يَاكِلْ الهوجاس صَبْري والعواصف تِزْرعه

وِسْط قَلْبي والجروح بْدَاخله حَمْرَا نِدِيِّهْ

 

لكن احساسي بقِرْبه رَغْم بِعْدِهْ زوبعه

تَجْرِفْ الأحْزَانْ مَعْهَا والهواجيس الْخِفِيِّهْ

 

دام حِبِّهْ (أكسجيني) قِلْ فصولي الأرْبعه

له فيافي الْقَلْب تَزْهِرْ بالحياة العاطفيِّهْ

 

فَارِسْ أحْلامي أحِبِّكْ حِبّ قَلْبي منْبعه

حِبّ يِتْحَدَّى التِّصَوِّرْ وِالْحِرُوْف الأبْجديِّهْ