يا صَمْت حِلْ بْدِنْيتي وِشْ نِيِّتِكْ بَعْد السِّكَات

أدري بأنّ العاصفه تَطْرِقْ عَلَى ابواب السِّكُوْت

 

مَلّيت تاخذني وحيده ثُمّ ترميني شتات

وَاجْمَعْ شِتَاتِيْ مِنْ يِدَيْن القَهْر واصْرَخْ دُوْن صوت..!

 

اشتاقت عْيوني لْوِسَنْها والمدامع مُنْهَكَات

الاحزان صارت أوكسجيني والأسى وِالْهَمّ قُوْت

 

لكنّ إيماني غَرَسْ فيني الجلاده والثّبات

والصَّبْر مِفْتاح الفَرَجْ.. روح الأمل بستان تُوْت

 

وش يمنعك يا قلب تصبر والصبر تاج الصِّفات

ما شِفْت وِش لون النبي (يونس) صمَدْ في جَوْف حُوْت

 

مهما يطول الْبَحْر في كل الزّوايا والجهات

لا بدّ نلقى يابسه ترسي عَ ضِفّتْها اليخوت

 

من قال أنّ الهَمّ نَقْمه والأسى مْن المعضلات

لولا الحِزِنْ ما كانت أشْعَارْ وْتَرَانِيْم وْبِيُوْت

 

هذي (تِسَعْتَعْشَرْ) سِنِهْ عِمْري واحِسّه بالْمِيَاتْ

وش لون ما احِسّه كذا والدَّهْر بَيْت العنكبوت

 

لانّي عزيزة نَفْس واخلاقي على القِمّه تبات

وَصّلْتِنِيْ حَدّ الممات وْعَيَّتْ أنْفَاسي تموت..!!

 

ما غرّت عْيوني القلايد واللّيالي المُتَرفات

دام العمر ساعه وْتَعَدِّيْ والشِّقَا لَحْظه وْتفوت

 

ما دام عمري والليالي المقبله مْن المُبهمات

يا قافي تْوَكَّلْ على الله وِالْعَبْ بْبَاقي الكروت