كَنّ البكا صَوْت ٍ وْمَخْنُوْق فِيْنِيْ

مَنْ يِقْدَرْ يْخَلِّيْ بكايه عَلاني؟

مَا احْدٍ طعَنّي.. طَعْنِتِيْ مِنْ يدَيْنِيْ

وما احْد ٍ على طَعْنَةْ يِدَيْنِيْ بِكَانِيْ

الْعَيْب مِنْ طِيْبي ومن طِيْب طِيْنِيْ

اللَّى عَلى دَرْب الحسوفه خَذَانِيْ

حسوفتي ما تِنْقَرَا وِسْط عَيْنِيْ

وْلا تِنْكِتِبْ بَيْن الضِّلوع المحاني

حسوفتي تغريبتي في سنيني

وضياع أماني.. من يرَجِّعْ أماني

وش هو يعَزِّيْنِيْ وْوِشْ يِحْتِوِيْنِيْ

وِشْ هُوْ المكان اللي يعَوِّضْ مكاني

مكاني اللَّى لا ذِكَرْتِهْ.. جِبِيْنِيْ

نَدّى لِطَارِيِّهْ وْفَزَّزْ كياني

وحدي أتَمْتِمْ وِحْدِتِيْ من حنيني

يا ضِيْق بالي وَيْش اسَوِّيْ عَسَاني

لوما قِطَعْ ظَنّ المفارَق يقيني

كان اتّقيته مَيْر أنَا مَا مِدَاني

مِسْتَقْبلي مَرْهون وِالْحِزْن دَيْني

وْلا يسْقِط إلاّ من سقوط الأماني

لاَ وا شِقَا حالي وما اكْثَرْ أنِيْنِيْ

كِلْ مَا طَرَى لي وقتي الأوَّلاني

قولوا إذا وفّيت طَعْنَةْ يِدَيْنِيْ

الله يِرْحَمْني وْيِرْحَم زماني..!!