عَذْب الوداد الوفي مَا تِنْقَضْ أرْكَانه

يبقى اللِّزَمْ بِالْغَلا لَوْ حَالَتْ ظْرُوْفه

لو خَذْت شَهْر الْحُوِيْ ما اشُوْف بِيْبَانه

جَنَّاتْ قَلْبِيْ بطِيْب الْخِلْق مَحْفُوْفه

صِدْقَانْ مَنْ هُوْ شَرَاتِيْ مثل صِدْقَانه

أهْل الوفا والصّفا وِالشّان والنَّوْفه

(لِقْمَاش) وِ(الْيَكّ) وِ(الْحَصْبَاهْ) وِ(الدَّانه)

جوَاهِرٍ بِالْوفا نَزْهَهْ وْمَحْفوفه

وِاللَّوْث ما عِنْدِيه مِثْقَالْ لاَوْزَانه

ولا احَشْم لى ما حِشَمْ مِ الزَّلِّهْ حْروفه

جَرَّبْت الايَّامْ هُبْ اْلايَّام خَوَّانه!!

بَعْض الاجْنَاسْ الْخِيَانه عِنْدهم شَوْفه

زَامَلْت الايَّامْ مَحْزونه وْفَرْحانه

وْجَرَّبْت عِرْبَان مَغْموره وْمَعْرُوْفه

وْكَم شِفْت أسَامِيْ لَهَا شَنّه وْرَنّانه

وْهِيْ لى تِقَارَبْت مَرْبُوْشه وْمَخْفُوْفه

عِطْني وْبَاعْطِيْك وِ(الدّانه) عِوَضْ (اْلانه)

واذا قِطَعْت بْسِبَبْ مَا حَثَّوْا اللَّوْفه

أمَّا الرَّحَمْ حَدْر مِطْرَقْ فَوْق سِنْدَانه

مَقْطوعه أوْصاله وْالاجْرَاحْ مَنْزوفه

لَمَّةْ خَرَارِيْف قَوْل وْقَالَتْ فْلانه

وْكفَّارَةْ الْمِجْلِسْ بْتَحْرِيْف مَخْلوفه

أصْلاً مِنْ تْشُوْف الاخّ يْنِمّ فـِ.. اخْوَانه

إغْسِلْ يِدَيْنِكْ تشوف الْحَوْبه بْحَوْفه

اْلِعْيون تِتْشَاوَفْ وْالِقْلُوْب لَعَّانه

وِشْ حَدّهم وِالذِّمَمْ ما هي بْمَكْلوفه

وَانَا تَعَاوَضْت بالصِّدْقَانْ جَذْلانه

لى ثَبِّتَوْا بِالْوِدَادْ النَّزْه وِحْلوفه

نَقَّيْتهم من مدار الْوَقْت وَازْمَانه

أفْلِقْ قماش الْغَلا مِنْ لِبَّةْ صْدُوْفه

كِلٍ يَرَى في عيون أحْبَابه أوْطَانه

وِبْدُوْنهم سَجَّةْ الأفْرَاحْ مَعْيُوْفه

لَى مَجْلِسِيْ مَا عِدَاهُمْ دَوْر فِنْجَانه

يَا عِلّ يَسْقِيْهُمْ الْوَكَّافْ بِقْنُوْفه