يمْلاك (بُوْ رَاشِدْ) مَعْ الصِّبْح إيْجَابْ

(ما يمْلَئِكْ) إيْجَابْ مِثْله وْيحْيِيْك

هُوْ يَدْرِيْ الدِّنْيَا زَخَارِفْ عَلَى تْرَاب

لكِنْ مْزَخْرِفْهَا خَلَقْهَا تِنَادِيْك

إبْدِعْ تِنَافِسْ بِالشَّرَفْ لَيْس كَذَّابْ

الكذْب بِالتَّالي عَلَى النَّارْ يَرْمِيْك

الله خَلَقْ دِنْيَاكْ لِعْيُوْنِكْ كْتَابْ

إقْرَا كِتَابْ الْكَوْن لا تْنَامْ عَيْنَيْك

يا شَايِفْ الدِّنْيَا عَذَابَاتْ وِحْرَاَبْ

لا تَكْسِرِكْ الاوْهَامْ لاَ تَاسِرْ يْدَيْك

إفْرِدْ جِنَاحِيْنِكْ عَلَى رَاسْ مِرْقَابْ

وِاحْفِرْ عَنَاوِيْنِكْ مَعَالِيْ مَعَالِيْك

لاَ يهْزِمُوْنِكْ جَهْل وَاحْقَادْ وِارْهَابْ

لا يَذْبحونكَ طَعْن فِيْ ظهر مَاضِيْك

خَلِّكْ سَنَا فِيْ قَلْب حَاضِرْ وْلَوْ غَابْ

لِلنَّار حِسَّادِكْ وْللِنُّوْر غَالِيْك

خَلِّكْ مِثِلْ مَا لاَحْ (بُوْ رَاشِدْ) إيْجَابْ

الصِّبْح صِبْحِكْ وِالأْغَانِيْ أغَانِيْك