صَوَّتْ الدَّاعِيْ عَلَيْنَا مِ (الْمَنَامِهْ)

وِانْهِمَرْ مِنْ (بُوْظَبِيْ) سِرْب السَّلاَمْ

فِيْ (الْمَنَامِهْ) لاَحْ بَارِقْ فِيْ غمامه

وِانْحِدَرْ فِيْ (بُوْظَبِيْ) هَاكْ الغمام

وِالْتِفَتْ وَجْه الْمَلِكْ صِبْح ٍ وْهَامه

صَوْب (بُوْ سِلْطَانْ) وِعْيُوْنِهْ كَلاَمْ

قَالْ (بُوْ سِلْطَانْ) فِيْ عِزّ وْصَرَامه

تَمّ ..وِانْهَالَتْ بَنَادِقْنَا سِهَامْ

يا سَلاَمْ الله سَلامه يا سَلامه

مَا عَلَى (الْبَحْرَيْن) مِنْ دَاعِيْ خِصَامْ

دَامْ (إمَارَاتْ) الْوِفَا رَاسْ وْزَعَامه

تَرْكَبْ الْعَالِيْ وْلاَ تَرْخِيْ حِزَامْ

يَا (الرِّفَاعْ) وْيَا (الْمِحَرَّقْ) يَا الشَّهامه

يا صباح ٍ ضَاقْ بِطْيُوْر الظَّلاَمْ

جَيْشنا وَاحِدْ حِسَامِكْ مِنْ حِسَامه

كِلِّنَا يَا دار فِيْ كَفِّكْ حِسَامْ

راعي الشَّيْنِهْ تِعَثَّرْفِيْ مَرَامه

والله الله مَا غِدَيْتِيْ لِهْ مَرَامْ

ذَا شبَابْ أهْل الْمَعَاِليْ وِالْكَرَامه

كِلِّنَا فِيْ خَنْدَق ٍ جِنْد ٍ كِرَامْ

أقْبَلْ أقْبَلْ وِاْلعِمِرْ لِلْوَعْد سامه

مَا يهَابْ وْلاَ يِرِدّ وْلاَ يِضَامْ

هذا (طَارِقْ) يَا سَنَا الْمَجْد وْسَنَامه

وْهذا (طَارِقْ) طَارِقْ الشَّهْم الهمام

هذا (طَارِقْ) فِيْ الوفَا نُوْر وْعَلامه

هذا (طَارِقْ) للوطَنْ فَخْر وْوِسَامْ

الشّهِيْد الْحِرّ لَى عَاليْ مقامه

غَاِلي ٍ دَمِّهْ وْلِهْ قَدْر وْمقام

والوطَنْ (طَارِقْ) وْ(طَارِقْ) بِاحْترامه

فارِض ٍ حِبِّهْ عَلَى رُوْس الأنَامْ

إصْطِفَاهْ الرَّبّ يا مَطْيَبْ مَنَامه

نَامْ فِيْ أرْض الشَّرَفْ نَوْم الْكِرَامْ

يَوْم صَوَّتْ لِلْوَغَى دَاعِيْ (الْمَنَامِهْ)

إنْطَلَقْ جَيْش النِّشَامَى لِلأمَامْ