أكِّدْ عَلَى اوْرَاقْ الذِّهَابْ وْقَطِّعْ أوْرَاقْ الإيَابْ
هذا جِوَازْ الْبِعْد جَهَّزْتِهْ وْذِيْ حَقَايِبِهْ
بَارْحَلْ عَنْ آلامي وَادَوِّرْ لِيْ عَلَى دِيْرَةْ غِيَابْ
غِيَابِيْ أفْضَلْ مِنْ وِجُوْدِيْ وِالسَّعَادِهْ غَايِبِهْ
يا الَّلى تِحَرِّضْنِيْ عَلَى الْمِقْعَادْ خَالَفْك الصِّوابْ
وَاشْوارِكْ اللَّى جِبْتها مِنْ عَامْ مَا هِيْ صَايِبِهْ
مَا عَاِدنِيْ مِتْحَمِّل ٍ مِنِّكْ وْلا كِلْمَةْ عِتَاب
مَا فِيْه دَاعِيْ لِلتَّعَبْ وِالنَّفْس قِدْهَا طَايِبِهْ
ْ
دَقَّيْت بِيْبَانْ الأمَلْ.... وْلاَ اْنِفتَحْ لِيْ غَيْر بَابْ
ما ادْرِيْ وِشْ اسْمه..!! بَسّ أظِنْ باب الحظوظ الْخَايِبِهْ
أحْتاج شَمْع.. أحْتَاجْ شِعْر.. أحْتَاجْ أشُوْف إنْسَانْ غَابْ
ويا للأسَفْ في غَيْبِتِهْ صَارَتْ حَيَاتِيْ سَايِبِهْ
الشَّمْع ذَابْ.. الشِّعْر ذَابْ.. الشَّوْف ذَابْ.. الْعِمِرْ ذَابْ
وأشيائه اللَّى وِسْط صَدْرِيْ كِلّ ابوها ذَايِبِهْ
أجْهَدْت نَفْسي بَالْهِقَاوِيْ فِيْ مِتَاهَاتْ وْسَرَابْ
يا ضَيْعَةْ اللَّى مَا عَرَفْ دِنْيَاهْ وِشْ هِيْ جَايِبِهْ..!!
الْحِبّ.. شَايِبْ مَاتْ..!! وِسْنِيْنِهْ قِضَاهَا فِيْ عَذَابْ
وِالْقَلْب عَافْ الدِّيْرِهْ اللَّى مَاتْ فِيْهَا شَايِبِهْ..!!
إخْتِمْ جِوَازْ الْبِعْد والرِّحْلِهْ ذَهَابْ بْلا إيَابْ
... لا تَحْزِنِكْ عَيْن ٍ مِنْ دْموْع الْمِوَاجَهْ رَاِيبِهْ
مُوْ بَسّ أنَا اللَّى شَايِلْ هْمُوْمه وْمِغْرِيْه الْغِيَاب
حَتَّى الْمِطَارْ آحِسّ فِيْه أشْيَا كِثِيْرِهْ غَايِبِهْ..!!