مِنْ رَوْعِتِكْ حِزْنِيْ الْمِزْمِنْ كِسَرْ نَايِهْ
رَاحْ التَّرَحْ وِالْفَرَحْ وَافَى تَلاَحِيْنِيْ
مِنْ زَوْد مَا هَلّ هَتَّانِكْ عَلَى حْشَايِهْ
خَوَّفْتِنِيْ مِنْ هِمَالِيْلِكْ عَلَى طِيْنِيْ..!!
آخِذْ مِنْ ضْلُوْع صَدْرِيْ لْبَرْدِكْ وْرَايِهْ
وِيْطِيْح قَلْبِيْ جَمِرْ.. وِيْسَابِقْ يْدَيْنِيْ..!!
الزَّيْن مِنْ عِقْب زَيْنِكْ كَذْبَةْ وْشَايِهْ
شَرْوَاتْ عِلْم ٍ سِعَوْا بِهْ لِكْ مَعَادِيْنِيْ
مَا كَنِّكْ إِلاَّ مِنْ ايَاتْ الْعَجَبْ آيِهْ
تِرْعَى بِرِيْضَانْ رُوْحِيْ وْتَزْهِرْ سْنِيْنِيْ..!!
آلَذّ وَاشْهَى مِنْ التَّلْمِيْح بِالْغَايِهْ
بِالذَّاتْ لَى مِنْ تِلاَقَتْ عَيْنِكْ وْعَيْنِيْ
مِنْ (ألْف لَيْلِهْ وْلَيْلِهْ) عَيْنِكْ حْكَايِهْ
أرْوَعْ مِنْ الشِّعْر وَابْدَعْ مِنْ مِضَامِيْنِيْ
بَدْر ٍ عَلَى الأرْض تَمْشِيْ لاَبِسْ وْقَايِهْ..!
وِاللَّيْل مِنْك اسْتَلَفْ زِلْفِكْ يِغَطِّيْنِيْ
وِالشْمْس لاَقَتْ لِهَالَتْهَا بِكْ مْرَايِهْ
عَوَّدْ عَلَيْهَا السَّنَا مِنْ خَدِّكْ لْجَيْنِيْ
لَوْ شَافِكْ الْعَابِدْ النَّاسِكْ خَلَفْ رَايِهْ
خَلَّى التَّعَبِّدْ وْغَنَّى حِسْنِكْ (هْجَيْنِيْ)..!