إيه غِبْت وللغياب اسباب واكْثَرْ من إجابه

لكنْ اللَّي ضَيّق الدنيا وزَعَّلْها جوابي

 

أدري أنّي لي حضور وْ لي شموخ وْ لي مَهَابه

لكِنْ اللي ماعَرَفْتِهْ واجْهَلِه قِصّة غيابي

 

كل ما في الأمر خطوَه وانتهت في وِسْط غابه

ماني أوَّل مَنْ يقول الليل هُوّ اللَّي غِدَا بي

 

أعْتِذِرْ ما دام تَوّ العِذْر في أوَّلْ شبابه

ما يكفِّيْني بليّا عِذْر ضَحَّيْت بْشبابي

 

عَلِّموني هو بقى للصَّوْت باب آهِجّ بابه

عَلِّموني هو بقى للصَّمْت موت وْ له ترابي

 

آه مِنْ هَمّ الضِّلُوْع اللَّي عِوَتْ فِيْه الذِّيَابه

لين صِرْت ألْبَسْ هموم النَّاسْ قَبْل ألْبَسْ ثيابي

 

هي أسُوْد أوْ هِيْ ملامِحْ ناس وِالاَّ هِيْ قَرَابه

عاد أنَا ماني شحيح آصِكّ لِلْمَدّات بابي

 

يمْكِنْ أكْثَرْ شَيْ يكْسِرْني رفيقي في عتابه

لا تَرَكْنِيْ قَبْل لا يِفْهَمْ وَلا يسْمَعْ عِتَابي

 

وش يبي قَلْب (المعافى) في لحَن قوس (الربابه)

الربابه (لِلصِّوِيْب) اللَّي وَرَا قوسه (ربابي)

 

قال لي دَهْر وْقِفَار وْقِلْت له: هذي سَحَابه

قال لي عِشْب وْمسِيْل وْقِلْت: هذا مِنْ سِحَابي

 

أدري أنّ وْجِيْه خَلْق الله ملامِحْها تشابه

لكن اللَّي ما تشَابَه مَعْ ملامحها صوابي

 

جَرْح قِرْب وْجَرْح بِعْد وْكِلّها هَمّ وْكآبه

ما خذَيْت اللَّي عطَيْت وْلا جنَيْت اللَّي بقَى بي

 

عَلِّموني هو بقى للصَّوْت باب.. آهِجّ بابه

عَلِّموني هو بقى للصَّمت مَوْت.. وْ له ترابي