سَاعِدْنِيْ أنْسَاكْ..!! لاَجْل اشْتَاقْ..!! وَاتْذَكَّرْ..!
وَاجِيْك وَلْهَانْ وَادَفِّيْك بَاهَاتِيْ..!
نَوْد الصِّبَا مِنْ تِشَرَّبْ طِيْبِكْ وْبَكَّرْ
نِثَرْك عِطْرٍ عَلى كِلّ اتِّجَاهَاتِيْ
أتْبَادَلْ وْيَاكْ بَوْح الرُّوْح وَاتْفَكَّرْ
كَم يِخْتِزِلْ مِنْ جَمَالِكْ.. أجْمَلْ أبْيَاتِيْ..!!
أجَارِيْ الشَّهْد بِكْ وَ امَارِيْ السِّكَّرْ
حَلَّيْت فِيْ مِهْجِتِيْ وِاحْلَوَّتْ أوْقَاتِيْ!
إنْ شِفْت جِفْنِيْ عَلَيْك وْقَلْبي مْسَكَّرْ
عَلَيْك خَايِفْ مَعْ انِّكْ سَاكِنْ بْذَاتِيْ..!
مَا غَيَّرْ الْوَقْت صَفْوِيْ لِكْ وَلاَ عَكَّرْ
مِتْوَافقه فِيْك رَغْبَاتِيْ وْنَظْرَاتِيْ
وَافِيْ وْلاَ قَلْبِكْ تْبَدَّلْ وْلاَ تْنَكَّرْ
حِبِّكْ لِيْ أكْبَرْ مِنْ ذْنُوْبِيْ وْ زَلاَّتِيْ..!
آحَمْد رَبِّيْ عَلَى عِشْرَتْك وَاتْشَكَّرْ
عِزّ الطَّلَبْ جَتْ عَلَى ذَوْقِيْ وْ مِشْهَاتِيْ
ما شِفْت مِثْلِكْ عَلَى مَا احِيْد وَاتْذَكَّرْ
وْلاَ صَارْ مِثْلِكْ وْلاَ مِثْلِكْ بَعَدْ يَاتِيْ