لَيْلَةْ هِرُوْب

كتابة السِّر بالأوْرَاقْ مِثْل الجهر

بَعْض الْوَرَقْ (مِشْكِله).. يملّ حَتَّى الجيوب

الليل ليلي وانا (صالح).. زبون السَّهَرْ

مَا جَتْ على الضِّيْقه الَّلي قَبْل وَقْت الْغِرُوْب

أنَا.. أنَا لِلْحِزنْ عَلَى حِدُوْد الْقَهَرْ

أنَا.. أنَا لِلْهَلاكْ.. أسْتَغْفِرْ الله وَاتُوْب

كَنِّيْ فقيرٍ يبيع الثَّلْج وَقْت الظِّهر..

وِيْشُوْف قِدَّام عَيْنِهْ رَاسْ مَاله يذوب..!!

وِانْ قِلْت: هذا الدَّهَرْ.. باقول: (هذا الدَّهَرْ)

وِانْ قِلْت: مَا هُوْ صحيح.. آقُوْل: وَقْتِيْ كذوب

تَدْرِيْ.. مَا دام انْت ياحَظِّيْ مصَبّ النَّهَرْ

بَازْرَعْ مِنْ الْحِلْم قطره للعطَشْ وِسْط كَوْب..!

وْبَاصُوْم يَوْمَيْن.. عَشْر ايَّامْ.. وِالاَّ شَهَرْ

وْبَافْطِرْ عَلَى الموت يا ضَاقَتْ عَلَيّ الدّروب

بَاموت ما احْتِجْت.. والحاجه تقِصّ الظَّهَرْ

وْبَاعِيْش لو مَا مَلَكْت إلاَّ عمامه وْثَوْب

يَغْنِيْنِيْ الْغَيْم يا سَوْلَفْ عَلَيّ الطهر

وَانَا مَعِهْ وَآتِسَاقَطْ مِنْ عِيُوْن الذِّنُوْب

يطيح حَظِّي ولا أرْمِيْه رَمْي (الزَّهَرْ)

فِيْنِيْ حِسِنْ كِثْر مَا الله حَطّ فِيْنِيْ عِيُوْب

اللَّيْل مَظْلوم لو كِلِّهْ (ثقافة عِهِرْ)

رسَمْ سِوَادِهْ عَلَى وَجْه الليالي شِحُوْب

يا لَيْل خَلِّكْ مَعِيْ.. يا شَمْعدان انْصِهِرْ

يا حِزْن رِحْ.. ما بِقَى لِكْ غَيْر لَيْلَةْ هِرُوْب