تاج الطايلة

عَلَى عَصْر (الرّشيد) اللَّى يرَدِّدْ مَجْده (الزِّرْيَابْ)

وصهيل الخيل وانفاس النِّفَلْ من بدّ الاعشابي

يعِنّ الشِّعْر للشاعر وغيدا قِد زَهَتْ بِخْضاب

لعَيْنَا شوقها من ذوقها الراقي وترقى بي

لمَدْح الشَّامِخْ الرَّاسِخْ عريق السَّاسْ والأنساب

مفاهيم الرجوله والبطوله كل الالقابي

خَذَاها الشيخ (بِنْ مَكْتوم) تاج الطايله ما هاب

(محمَّدْ) يوم غيره هاب لا وَدَّى ولا جابي

شديد الباس ما يحسِبْ لكل الكايدات حْسَابْ

كِعَامْ الْمِعْضلات وْبيرقه في المزْوِيْ النَّابي

فَنَارْ (دْبَيْ) نِبْرَاسْ العلوم الصَّيْرَمْ الْمِنْهَابْ

على رِفْقه وقلبه شَرّعَه من قَبْل الابوابي

تغَلَّيْ وافرحي يا قَلْب (بوراشد) اش جاب لْجَابْ

إلا بِنْتي يظَلِّلْك الغمام وْشالِكْ انسابي

على ساحِلْ بَحَرْك الشِّعر في فِيْه الفرايد ذاب

يا عِنْوان البروج الشامخه في كِلْ الاقطابي

شذَى وَرْدِكْ على خَدِّكْ يفوق (الشِّيْح) و(الوَزَّابْ)

ألَذّ مْن الخنين اللي لِفَوْا به سوق الاطيابي

يصحِّيْ بارِدْ الحِسّ وْحبيس الهَمّ والأتعاب

يفارِقْه الْغثَا واللَّيْل قَمْرَا نورها حابي

يا (بو راشد) يقال الغيض من فَيْضْ وْجَوَابْ وْباب

قصيدي مَدْحكم يا مَنْ على عِزّ وْشَرَفْ رابي

سموّك دايمٍ سامي ويرقى قمّة المِرْقَابْ

ينوْمِسْ داره وْشَعْبِهْ وْعِرْبَانِهْ والاجْنَابي

بنَيْت لْدِيْرِتِكْ مَجْدٍ تفاخر به مدى الاحْقاب

يفوق أمْجاد مَا سَوَّاهْ لِبْلاده (حَمُوْرَابِيْ)

رعاك الله تَرى لِلْعِلْم سوق وْللفحول رْضَاب

وِلا مِنّه وِصَلْك العِلْم يِصِيْر السَّالِبْ إيْجَابي

لذلك سَيّدي مَا شي يزين بْلا تَعَبْ واسباب

خَلَقْك الله سبب تطوير حاضِرْ مَا لِكْ غْيَابي

مِثَالْ الشَّيْخ والفارس وشاعر له جَنى وِعْذَاب

تميل أفْنَانها بِجْنانها يا أنْبَلْ اعْرَابي

همَى زاد البشَر يا شيخ في يومك ثلاث وْجَاب

أنا زادي قِصِيْدٍ يجْذِبهْ عِطْران الاشْنَابي

شراتك والقصيد لْيَا دعا المضمون جَفّ وْشاب

وقافٍ يَجْذِبْ حْروفه سِمُوّك ما بَعَدْ شابي