كل ما تِثَاوَبْ لَيْلِيْ فْــ .. وَجْه الأماني و الهوَى
غفَت عيون السِّجْن عن سَجَّانها وْ بَابْ الفَرَجْ
وْ بَانَتْ ملامح صورة اللى كل ما ليلي عِوَى
أتْخَيّله.. بين الممرّات الحزينه وِ الدَّرَجْ
وْ بِدَتْ بصدري، ذكريات الْحِبّ تحْطِبْ للنوى
ضلوع لا من شافهن حَطَّابْ الاحْلام إنْحَرَجْ
لِلّى تَرَكْني بين لاهوب الجفا وْ بَرْد الْغِوَى
مِنْ بَعْد ما قَلْبي تَحَتْ رَحْمَةْ لواحظْه إنْدَرَجْ
أمرّ من بيته، لو إنْ قلبي مِنْ الْفَرْقَى إسْتِوَى
أتْكِي عَلَى الذِّكْرى لو انّي من غيابه آعَرِجْ
وَاتْنَشَّدْ الْجِيْران عَنّه كل ما دَمْعِيْ رِوَى..
وَجْه اليتيم اللَّى الْحِزِنْ من بين حِيّاته مَرَجْ:
ما مَرّكم نَوْر ٍ غِشَاهْ اللَّيْل، لا مِنّه لِوَى..
يدايله، كَنّ القمر في وَجْهِهْ الْغَاوِيْ عَرَجْ..!
وآصِدّ لَوّ انْ صَمْتهم عالي و في صدري دِوَى
لولا ضلوعي كان قَلْبِيْ من معاليقه خَرَجْ!!
عَسَى عيوني، كل ما هَبَّتْ نِسَانِيْس الْهِوَا
تعَلِّمْ السَّجَّان، وِشْ خانَةْ: مِوَاعِيْد الْفَرَجْ