نثَرْت الْغَلا والأرْض خصْبه وانا فَلاَّحْ

عسى الله يوفِّقْ واجني الحبّ واثماره

تخيَّلْت (زايد) يَكْتِبْ البيت وانّه ناح

عَلَى الأرْض دَمْعي يَلْثِمْ الرَّمْل وِغْبَاره

تذَكَّرْت شَيْخٍ شَلّ شَعْبه بكَفّ الرَّاحْ

هَدَى الشَّعْب حِبّه واحترامه ومِقْداره

بنى الدوله اللَّى مِسْكها في البريّه فاح

عَسَى الله يحَرِّمْ وَجْهه السَّمْح عَنْ ناره

عسى الْبَرْزَخْ اللي يَعْبره (زَايِدٍ) سَمَّاحْ

كثير الْبَرَاد وْوَاسِعْ وْتِحْمَدْ أسْرَاره

عسى (زايدٍ) فِيْه المسافِرْ أوْ السوَّاحْ

يمرّه مريح وْمَقْعَدِهْ فِيْه يِخْتاره

لَعَلّه على كِثْر العطايا لقى وارتاح

عطاه الله أكْثَرْ مِنْ عطاياه وَاثاره

عَسَى مسْكنه فردوس رَبّي مَعَ اللَّى راح

عَسَانا نشوفه دَاخِلْ الْخِلْد زوّاره

نحِبّه ويشهد رَبّنا الواحد الفَتَّاحْ

محَبّه بناها في حياته بإصراره

رَحَلْ (زايد) ولكن بقَى مَوْطِنِهْ يا صاح

تسَلَّمْ مقاليد الحِكُمْ فِيْه صَقّاره

(خليفه) خِلِيْفَةْ (زايد) المومن اللَّى لاح

سَنَا رَحْمَةْ الله في خطاوِيْه واخباره

(خليفه) إذا طاحت نجوم السّما ما طاح

تدور الكواكب حوله وْتَعْكِسْ أنْوَاره

عطاه الله (مْحَمَّدْ) وهو مَنْبَعْ الأفْرَاحْ

(محمَّد) مدار وْحَوْله النَّاسْ دَوّاره

(محمَّدْ) وْمَعْه (مْحَمَّدْ) الواهِبْ المَنَّاحْ

(وَلَد زايد) اللَّى قادة العَالَمْ أنْصَاره

و(بو مْحَمَّدٍ سِلْطان) وِ(حْمَيْدٍ) النَّصَّاحْ

و(بو مْحَمَّدْ سْعود) وْ(حَمَدْ) شَرْقي دْيَاره

و(بُوْ راشِدْ سْعود المعَلاَّ) شَرَى الإصباح

شيوخٍ على وَضْح النِّقَا تكْسَبْ الشَّاره

قلوبِ البشَر طِلْقه لهم دونما مِفْتَاح

ترَبَّعْ عَلَيْهَا حِبّهم وَاطْلَقْ أفْكاره

عساهم ذِخِرْ للدَّارْ وِمْدَافَعْ الأتْرَاحْ

عَسَى تْرَابنا دايم بهم يِذْبَحْ أكْدَاره