نامي وَانَا بَاحْلَمِكْ مِنْ جِمْلَةْ أحْلامي

يجوز إنِّكْ تمِرِّيْ لَيْلتي صِدْفه

يجوز تمْطِرْ شِعِرْ وِتْسَيِّلْ أقْلامي

يا صفحة الْحِبّ يا حِبْره وْيَا حَرْفه

طِلِّيْ مِنْ الْغَيْم.. ضَوِّيْ كَالِحْ أيَّامي

يا رَبّ حَنِّنْ قمَرْنا لْمِعْتِمْ الشِّرْفه

صحيح كِنْتي السَّراب فْـ ناظر الظَّامي

يرَاودِكْ يا الْعَطَش لَيْمَا لِقَى حَتْفه..!

الْجِلْد ذاب، وْتَعَرَّى أبْيَضْ عْظامي

يا ثِقْل دَمّ السنين اللى على كَتْفه

إحْتِجْت لِكْ (شَمْعِتَيْن) تْنَوِّرْ أعْتامي

أكِيْد شَمْسِكْ عَنْ الْبَاقِيْن مِخْتَلْفه

إحْتِجْت لِكْ (دَمْعتين) تْوَاسي آلامي

مِنْ أوَّلْ الدَّمْع لَيْن أقْصَاهْ مِنْ طَرْفه

أحْيَانْ أقول الرّبِيْع الْخَصْب قِدَّامي

واحْيَان أقول الْحَيَاةْ مْن الْمُنَى أتْفه

فِضْفَاضْ يا ثَوْب حِلْمي تكْنِسْ أوْهَامي

تِعَرَّجَيْ يَا خِطُوْط الْحَظّ فِيْ كَفّه

شاطي حِزِنَّا طويل كْثِيْر.. مِتْرامي

تنَمْرَدْ الدَّمْع مِنْ طَرْفه إلَى طَرْفه

تناسلي يا الهموم فْـ.. غِرْفَةْ آثامي

وَانَا بَاخون الْعِيُوْن، وْبَاطْعَنْ الْغِرْفه

بَاكِرْ يذوب الجليْد وْيِزْلَقْ الرَّامي

تموت عَذْب الحروف فْـ.. سَاحَةْ الشِّفّه

وإذا لِمَحْتي دموعي، جَرِّبِيْ.. نَامي

يجوز إنّك تطيحي قَبْلها صِدْفه..!