الهشيم اليانِعْ!

يا صَاحِبِيْ مِنْ يوم رَبِّي خَصِّني بِوْصَالِكْ

نَسَّيْتِني لَى قِدْ مِضَى مِنْ سالفات أيَّامي

واحْييت قَلْب ٍ مِنْ صروف الوَقْت ليله حَالِكْ

وامْسَى هِشِيْم الْعِمْر يانِعْ مِزْدِهِرْ مِتْنامي

يا حَيّ ذاك الْمِلْتقى والشَّوْف لَى فِــ قْبَالك

يا الله عَسى انِّك دَوْم تِبْقى يا الْغَلا بَاوْلامي

ويا حَظّ مَنْ يابه زِمانه واصْطِبَحْ فِيْ فَالِكْ

يرْوي عِطَاش الْوَقْت لو هو مِن قِدِيْم ٍ ظامي

حَظّه تِعَلاَّ في السِّمَا مِنْ يوم حَظّه نَالِك

نافِل عَلَى كِلّ الْمَلا فِيْ الشَّاسِعْ الْمِتْرَامِيْ

أشْعَلْت ليلي بالْفَرَحْ في صَدِّتِكْ وِاقبْالِكْ

وْعَلَّمْت لى عِمْره شِقَا إِنّ الْحِزِنْ ما دامي

لَى جِيْت أثِيْرِكْ بِالْعَتَبْ! ثَرْ هَالْعَتَبْ يحْلا لِكْ

تخْجِلْني بْطِيْبِكْ وْضِحْكَةْ قَلْبِكْ الْمِتْسَامي

يِطِيْب لِيْ مَعْك السَّمَرْ وَاسْهَرْ على مَوَّالِك

رَوْعَة حديثك.. هَمْسِتِك تَشْفي جروح أقْدامِي

ْ

يا وَيْل حالي هَدّ لِعْبِكْ.. شُوْف قَلْبي هَالِكْ

كِلِّي أنا في ذِمِّتِكْ.. حقيقتي وَاوْهَامي

أشْكِرْ إله ٍ خَصِّني.. وَفَّقْني بْأمْثَالِكْ

أحْيا بِكْ إِحْساس الْغَلا أنْسَى بِكْ الآلامي