خليفة النَّاسْ

نِحْنَا (الإمارات) نهواها مِثِلْ مَا هِيْه

بِجْبَالها الشِّمّ بِشْيوخٍ تراعيها

وِبْأهْلها الطيِّبِيْن وْحَاضِرٍ نَبْنِيْه

وامْس ٍ عشَقْناه وَاحْلام ٍ نغنِّيْهَا

يَا بْلادنا يَا ذَرَانَا خافقي وِخْذِيْه

لِعْيون هذا الثَّرَى والرَّوْح وِخْذِيْهَا

العِزّ عِزِّكْ وْ عِزّ الغير مَا نَبْغِيْه

أنا بعِزِّكْ عزيز النَّفْس عاليها

يا الآدمي من يبيع الدَّار مَا نَشْريه

وِان باعت الناس بالغالين نَشْرِيْهَا

يا دار يا نار في صدر العدو تكويه

واهْل المحَبّه حمَام ٍ في روابيها

سلام يا شيخنا يا اللَّى عزانا فِيْه

ويا اللَّى كفوفه لقاصيها ودانيها

(خليفة الناس) لِكْ شَعْب ٍ كفى يكفيه

أنك وَلَدْ (زايد) اللَّى الأرْض كاسِيْهَا

أرْض (الإمارات) تِشْهَدْ له على ماضيه

وتشهد لك الأرْض حَاضِرْهَا وْبَادِيْهَا

وارْض (الإمارات) صَرْح الْمَجْد ما يَبْنِيْه

إلاّ عزومك يا بانيها وراعيها