بَعْض القصايد تحَيِّرْ عَقْل قاريها

وبَعْض القصايد تمرّ وْليت ما مَرَّتْ

والبَعْض مِنْها مخلَّد ذاع طاريها

وْكَم من قصيده كتَبْهَا الشاعر انْدَثْرَتْ

في ساحة الشِّعر شاعِرْهَا يباريها

هو يشتهر والقصيده عقبه اشْتَهْرَتْ

تِقْرَا قصيده وْوِدِّكْ لو تجاريها

وْتِقْرَا قصيده وروحك مِنّها انْقَهْرَتْ

وقصيدتي قِصّتي والكِلّ قاريها

بين العَرَبْ صيتها مذكور وانتشْرَتْ

كتَبْتها في الوطن واعْلى سواريها

على جدار الزمن بالحكمه ازْدهْرَتْ

وقصيدتي الجامحه مهره أماريها

بالصافنات الجياد اللى بها انْبهْرَتْ

بإحساسها أحتفي وْتمْطِرْ صحاريها

بِبَارِقْ الحِبّ والأحلام هي انصَهْرَتْ

أكْتِبْ بها الحب واحْيَا ما أواريها

ما دامها في وقار وْحِشْمه اسْتَشْرَتْ

إن عَبّرت فلسفة حِبّي أداريها

بالعاطفه والمعاني سِرّ ما انجهْرَتْ