حِلْم الأمم ينجِبْ لَهَا الدَّهر شَرْواك

ذِرْوَةْ سَنَامْ العِزّ عِنْد الخلوقي

دَيْدَنْ شعوب الأرْض يَا شيخ طرواك

في عْيونهم إنْت الوفيّ الصّدوقي

وفي عْيوننا ما لك شبيهٍ بدنياك

لانِّكْ عَنْ خْصال البرايا تفوقي

المجد عن غيرك تعذَّر وناداك

غيرك غروب وْإنْت شمس الشّروقي

سِبْحان رَبِّيْ كيف تَمَّمْ سجاياك

وَالْبَسْك ثوب العِزّ حِلْو الطروقي

بِمْكارِمْ الأخْلاق سِبْحانه أكْسَاكْ

حَتَّى غِدَتْ فِيْك العوالي تلوقي

رَحْمه لنا من عالي الشَّانْ أهْدَاكْ

رحيم في شعبك عطوفٍ رفوقي

دَايِمْ على الأيتام جَزْله عطاياك

تِزْرَعْ فَرَحْ في عْيونهم والخفوقي

يا اللَّى يسارك مَا عْرِفَتْ مَدّ يَمْناك

يا قِدْوَةْ اللَّى لِلْمعالي يتوقي

لو يتبعون خْطاك مِنْ طِيْب ممشاك

اللال ما يِشْبَهْ لِلَمْع البروقي

هذا سراب ٍ لو بَتِتْبَعْه عَنَّاكْ

وإنْته حيا يحيي هشيم العروقي

تسلم يمين اللى على الطِّيْب رَبَّاكْ

اللَّى على الطولات دايم سبوقي

(محمَّد المكتوم) من جوده أسقاك

من كِلّ مفنودٍ غزير العموقي

حتى سطع نجم السعد من محيَّاك

واسْمِكْ ما بين الناس صار مْعَشوقي

الله يعِزِّكْ فوق عِزِّكْ ويرعاك

ويحفظك يا (حمدان) من كل عوقي

عَنَّيْت لك هِيْني وْشَدَّيْت جَدْواك

وعلى روابي العِزّ نوَّخْت نوقي

هذا وسلامي والتحيّات تِنْصاك

من صادق الإحساس نَبْعه دفوقي