إبْشِرْ نبَتْ غِصْن الحقيقه عصافير!!
والصِّبْحْ فَتَّحْ في عيوني جِرَاحِكْ
اليوم سالَتْ من سنيني مشاوير
بالله قِلْ لي وين ألقى صباحك
عَلَّمْتني أهْدي دروبك نوَاوِيْر
وأهديتني طَعْنَةْ ألَمْ وِانْت ضاحِكْ!
مَرَّيْت بِكْ والْجَرْح يَنْزِفْ نوافير!!
وِانْتِهْ تزيد الْجَرْح.. غَدْرِكْ سلاحك!
مَلَّيْتني أقراك غَيْم وْتباشير
وَانْزِفْ وتهديني الصحاري رِيَاحِكْ
ما قِلْت لي قِدَّامْ نبْقَى مسايير
ما قِلْت لي لو طِحْت بَالْقَفْ جِنَاحِكْ
الله كريمٍ والمصايب مقادير
لا مَا انْكِسَرْ ضِلْعي سوَى من رماحك
هذا أنا دَرْبي إلى النور وَآسِيْر
بَامْسَحْ جبيني وانْت دَوِّرْ صَلاحِكْ
وابَشِّرِكْ واليوم تبكي عصَافير
الصّبْح فَتَّحْ في عيوني جِرَاحِكْ