اشتياق الطعون

غَصْب عَنِّيْ مِتِّصِلْ أسْأل عَلَيْك

وِدّي أعْرِفْ كيفها الدِّنْيَا بدوني

لا تظِنّ انّي وَلَهْت أوْ راح أجِيْك

مو أنا اللَّى اشْتَاقْ لِكْ.. هذي طعوني..!!

كِلّ جَرْح بْخَافقي قَبَّلْ يِدَيْك..!

والدموع اللَّى بليلي سامروني

حِرْقتي اللى في انتظاراتي تحيك

كل هذا الحِزْن فيني وْفي ظنوني

ضَمَّةْ أنْفَاسِكْ عَلَى صَدْر الشريك

كِلّ ما ضاقت على قلبي شجوني

شوقي المذبوح غَدْر بْرَاحِتَيْك

صَدِّتِكْ عَنِّيْ رَغَمْ صَرْخَةْ عيوني

لَهْفتي لِكْ.. حِبّي اللى مات فِيْك

وحشة العيدين لين يْغَايظوني

وْ(صَدْمة غْيَابك).. وكذبة (أيْه أبِيْك)

و(ما أخونك) كِلّهم عَنْك جْرحوني

وضحكة العِذَّالْ.. حِزْن أهْلي عَلَيْك

ذِكْرِيَاتي.. وِالصِّوَرْ.. جَوْا يسْألوني

لَيْه يعني خِنْتِنِيْ الله يْهَدِيْك

وَانَا لاجْلِكْ بِعْت كل اللَّى يبوني

قِلْت لك لا تَرْخِصْ اللَّى يشتريك

وْقِلْت لي غيرك كثير بْيعشقوني

تعْتِقِدْ بَاقْضي حياتي أحْتِرِيْك؟!

وانّ ما غيرك بيمْلا لي عيوني؟!