جديد المشاعِرْ يا هَلْ الشِّعْر والتَّعْبِيْر

على عادته ما سَكَّرْ الْوَقْت بِيْبَانِهْ

طموحه كبير وْوَاقعه يَرْفِضْ التغيير

على الدَّرْب الايْمَنْ نَهْجه الْحِرّ وَارْكانه

أعِيْش بْحضوره رَغْم الاعْذار والتَّقْصِيْر

يسطِّر حضوري وَابْذِلْ الْجِهْد مِنْ شانه

تجاوَزْ مَعِيْ مَرَاحِلْ الصَّمْت والتأخير

وكثير الوعود اللَّى بلا شَكّ خَسْرانه

مدَاها قصير وعَهْدها له كذا تَفْسِيْر

صريح العباره ما لها عِنْدَهَا خانه

مفاهيمها عَكْس المفاهيم وِالتَّصْوِيْر

ولو ما تصوِّر يكفي الحقّ برهانه

يظِلّ الجواب الصَّامِتْ أبْلَغْ مِنْ التبرير

يقولون والاَّ ما يقولون عِنْوانه

زمان العجايب في عَجَبْه الْعِجَابْ تْصِيْر

يا كِثْر التغَيِّرْ في حقايِقْه والْوَانه

لكِنْ ما تذِلّ وْ لا تِرِدّ الكبير صْغِيْر

سوَى مَنْ جَهَلْ تقدير غيره وْوِجْدانه

أحاسيسها تجهل مدى قيمة التقدير

مِدَى مَنْ رِجَحْ بين الْوِفِيِّيْن مِيْزانه

وتظلّ الجزاله قِمَّةْ الذَّوْق والتأثير

لها أبعاد فيِ لُوْل المعاني ومرجانه

على كِلّ حال وْما رسَخ في عقول الغير

سوى من قطَفْ جوهر نوادِيْه وِسْمَانه

ذَا والشّعور وْدافِعْ الشَّرْح والتقرير

سؤال ٍ جوابه ما تغيَّر ونيشانه

أبَد ما خضَعْت لْعَالَمْ الخوف والتَّحْذِيْر

خضوعي لخَلاَّقْ المخاليق سِبْحانه