تَهْوِيْمَةْ بَحَرْ

مَا قِدَرْت أسْتَوْعِبِكْ..!! كِلِّكْ ذِهُوْل

مِنْ ذِهُوْلِيْ مِنْك قَلْبِيْ مَا احْتَرَسْ

قَبِلْ لاَ اشُوْفِكْ وَانَا صَعْب الْمِيُوْل

لَيْن غَفِّكْ طَرْف عَيْنِيْ وِانْتَرَسْ..!!

الصَّدِرْ يِتْرَنَّمْ بْعَجْز ٍ كسُوْل

سَجْع تَهْوِيْمَةْ بَحَرْ شِعْر ٍ دَرَسْ

مَا خِذَتْ إِلاَّ ذِمَايِمْك الْخِيُوْل

وِذْبَحَتْنَا بِالتِّقَاطِيْع الْفَرَسْ

طَاعِنِيْ فِيْ رَوْعِتِكْ حَتَّى الْعِذُوْل!!

حِسْنِكْ مْسَكِّتْ إلَى حَدّ الْخَرَسْ..!!

كَنِّكْ إِلاَّ مِتْعَةْ الشَّقْرَا الشِّمُوْل

فِيْ الْجِسَدْ وِالرُّوْح لِكْ جَرْس وْجَرَسْ

دَامْ مَا بَقَّيْت لِلْعَالَمْ عِقُوْل

حِطّ من حَوْلِكْ عَلَى نَفْسِكْ حَرَسْ

كِلّ حِر ٍ يَرْفِضْ أنْصَافْ الْحِلُوْل

يِغْتِبِنْ لَى صَادْ لكِنْ مَا فَرَسْ!!