نُوْر الْفِعِلْ

لَوْ تِلَوِّحْ لِلْمِقَفِّيْ مَا يِشُوْفِكْ

من يعَزِّمْ يَتْرِكِكْ مَا يِلْتِفِتْ لِكْ

لاَ تِهِلّ الدَّمْع.. لاَ تَتْعِبْ كِفُوْفِكْ

خَلّ جِهْدِكْ لِلّذي ضَحَّى مِنْ أجْلِكْ

لا تِرُوْح وْتِسْأله وِشْ هِيْ ظروفك؟

مَنْ بَغَاكْ يْدَلّ أيْ دْرُوْب يَسْلِكْ!

إحْسِبه مِثْل اللَّى رَاحَوْا مِنْ ضِيُوْفِكْ

لا تعِدِّهْ شَيّ غالي مِ اللَّى تَمْلِكْ!

المحَبّه ما هي فرصه لو تطوفك

تَنْدِبْ الْحَظّ وْتقول الْحِبّ مُهْلِكْ

والسّعاده مَا هِيْ شَخْص ٍ لو يعُوْفِكْ

تِنْسَى رَبْعِكْ.. تِنْسَى نَاسِكْ.. تِنْسى أهْلِكْ!

صَاحِبِكْ لَوْ رَاحْ لا تَعْلِنْ كِسُوْفِكْ

خَلّ شَمْسك ساطعه مِنْ نُوْر فِعْلِكْ

لا تسِلّ بْوَجْه مَنْ يِشْمَتْ سِيُوْفِكْ

ابْتِسِمْ، جَامِلْهُمْ وْإعْمَلْ بِأصْلِكْ