مهداة إلى صاحب السمو الشيخ محمد بن راشد آل مكتوم

بِالـمْبَارَكْ صُومِكِ الشَّهْرِي

                          يَا زِعِيمِ الشَّعْبَ وامِيرِهْ

يِعْلِ أيَّامِكْ شَرَى الزَّهْرِي

                       يَاسِمِينِ وْفِلْ وِعْبِيرِهْ

وبِالصَّلَاه والصُّوْم وِالذِّكْرِي

                      نَاشِرِنْ بَينِ الْـمَلاَ سِيرِهْ

نَافِحٍ بِالطِّيبْ وِالْعِطْرِ

                   لِلْبِعِيدِ وْصَاحِبِ الْجِيرِهْ

نَاثِرِنْ مِنْ يَدْكِ كَالدِّرِّ

                  مِنْ حِصَابِي بْحُورٍ اغْزِيرِهْ

يَا وِسِيع الْقَلْبِ وِالصَّدْرِي

                 عَ الضِّعِيفِ وْلَي لِهِ عْذِيرِهْ

كَمْ عِطَى لِلْغَير في سِرِّي

                مَا يِعَرْفِهْ مِنْ أَحَدْ غَيرِهْ

يِنْفِقِ وْيَهْدِي بَلَا فَخْرِي

                كَالْغِيُومِ اللَّي تَرَى امْطِيرِهْ

ذِكْرِ لِكْ بَينِ الْمَلَا يَسْرِي

                 كَخِيُوطِ الشَّمْسِ لِـمْنِيرِهْ

فِ الْمِدَى وِفي وَاسِعِ الْقَفْرِ

               رَفِّ إسْمِكْ رَفّ بَنْدِيرِهْ

مْورِدٍ سِلْسَالِ كَالنَّهْرِي

               لِلشِّيَرْ وِالنَّاس وِلْطِيرِهْ

لَي بِهَا اتْحَقِّقِ الْوَطْرِي

              وِالْوَقِتْ أظْهَرْ بِهَا خَيرِهْ

بكْ عِبَرْنَا الْبَرّ وِالْبَحْرِي

          وصَارَتِ لْنَا سِمْعِهِ اكْبِيرِهْ

قَايِدٍ فِي ذَ الزِّمَنْ نَدْرِي

             أنِّكِ لْنَا بُوصَلَه وْدَيرِهْ

تِكْفَى مِنْ ظَرْفِ الْوَقِتْ عِسْرِي

              ويَا عَسَى أيَّامِكِ زْهِيرِهْ

بَاسِمٍ لِكْ فِ الدِّنَا ثَغْرِي

           وفِي سِرْورِ وْعَينِكِ قْرِيرِهْ

دُومِ كَالْبِسْتَان بِالزَّهْرِي

             يَانِعٍ بَانْوَاعٍ كْثِيرِهْ

كَالنِّدَى مَعْ بَزْغَةِ الْفَجْرِي

            لَي زَخَارِفْهَا بِكِ جْدِيرِهْ

أهْدِي لِكْ مِنْ شِعْري وْنَثْرِي

            رَمْزِ مِنْ ذُوقِكْ وْتَعْبِيرِهْ

ومِنْ ضِمِيرِي لِكْ كِلْ شِكْرِي

           يَا زِعِيمِ الشَّعْبِ وِكْبِيرِهْ