إحْمِدْ الله بِلاَدِكْ عِزّ وَارْضِكْ سَلاَمْ

تَرْقِدْ اللَّيْل ما تخْشَى وْقَلْبِكْ مريح

شُوْف حَوْلِكْ دِيَارْ الْغَيْر صَارَتْ هَدَامْ

ضَاقَتْ الأرْض بالنَّازِحْ وْ ذَاكْ الْجِرِيْح

الله الله نِحِنْ فِيْ دَارْ رَجْلٍ همام

مَا نِسَاوِيْه بِالطَّاغِيْ وْلاَ بالشِّحِيْح

يحْفَظْ الله (بُوْ سِلْطَانْ) بين الأنَام

مَنْ شَراته كريم النَّفْس قَلْبه فِسِيْح

ْ

عَلّموهم تَرَى مَا عِقْب هذا كَلاَمْ

غَيْر هذا تَرَى يا صاح مَا هُبْ صحيح

لا تبيعون دار السِّلْم بَارْض الهيام

ولا تبيعون عِزٍ شامِخٍ بِالطِّرِيْح

إحْضنوها تَرَى ما دون دار الْكِرَامْ

دَارْ (زَايِدْ) وْ (بُوْ سِلْطَانْ) أرْضٍ تريح

مَا تعِزِّكْ سوَى دَارِكْ وْلاَ لِكْ مقام

في سواها ولو سَوَّوْا لِكْ الطِّيْن شِيْح

يوم كِنَّا ظِمَا وِالْهِيْن عَطْشَى حِيَامْ

مَا سِقَانَا سِحَابْ الْقَاصِيْ الْمِسْتِرِيْح