جَوْهَرْ نِيِّهْ

(الفوت فات وْلا نِفَعْ باقي الصوت)

كَمِّلْ طريقك واغْنَمْ اللَّى تبَقَّى

غَرِّدْ لاجِلْ حِلْمِكْ واذا طال اْلِسْكوت

غَرِّدْ وْلا ترْقِبْ صدى صَوْت غَرْقى

يا كَمّ غَرْقَان ٍ نجا في بَطِنْ حُوْت

ما ذاق من ظلمه بشَرْ أوْ تشَقَّى

ويا كَمّ ناجي غَارِقْ بْكَفّ طاغوت

من ظِلْمه اللى كَسَّرْ قْلُوْب شَفْقَا

يا حاضن أحْلامك تمسَّكْ بِهَا مَوْت

ويا سَارِقْ أحْلام البشَرْ وَيْن تلْقَى؟

يَامَا عطينا للمفالِيْس يَاقُوْت

من جَوْهَرْ النِيِّهْ وصافي منَقَّى

ما نرتجي شِكْر ٍ وَلا رَدّ مَوْقُوْت

نرجي رضا الرَّحْمن في كِلّ مَرْقى

يا الله السلامه من شَرَرْ شَرّ مَكْبوت

يَامَا لحَقْنا الْجَرْح منهم وشقّا

اسم الوفا يبقى بالاطياب مَنْحُوْت

واللى سواه يْمُوْت مِنْ دُوْن شَنْقَا

يا قَلْب لا تيْأس وَلا ترْفَعْ الصَّوْت

كَمِّلْ طِرِيْقِكْ واغْنَمْ اللَّى تبَقَّى