ما باقي مْن الشَّهَرْ غير القليل الثقيل

والله يعين الذي من عِلِّتِهْ ما بَرَى

غَلْطَانْ من قال ما به في الْعِمِرْ مِسْتِحِيْل

من يِحْيي الحِلْم لى من صار تَحْت الثَّرَى

أشوف حَظِّيْ يميل آقول لا ما يميل

ما كِنْت عارِفْ بحِلْمِيْ انّه حِلْم فْقَرَا

عِمْر الِّلقَا كِنْت أظِنّه في حياتي طويل

لَيْن انْقِضَى كَنِّهْ إلاَّ حِلْم لَيْل وْسَرَى

ما اصْعَبْ مِنْ الدَّمْع يَاللى يَرْفِضْ انِّهْ يِسِيْل

مِثْلِهْ مِثِلْ جَمْر نِفْخَتْه الهموم وْوَرَى

أضْحَكْ مَعَ ذِكْرياتي والزمان الجميل

وابْكِيْ عَلَى ما جَرَى وِاللَّى بْعَدِهْ مَا جَرَى

واقول يا حَظّ هَلْ باقي مَعِكْ لي جميل؟!

واتْرَجِّعْ لْيِهْ الزِّمَانْ أرْبَعْ سِنِيْن لْـ.. وَرَا

يا الله يا حَسْرَةْ القَلْب الحزين العليل

في حِبّ من يِنْزَعْ الآهات لَى مِنْ طَرَى

طَيْفه بَعَدْ غيبته مِثْل الكريم البخيل

يفْرِحْ عِيُوْنِيْ وْيَحْرِمْهَا لِذِيْذ الْكَرَى

أحِسّ كَنِّي حيَيْت بْوِسْط عالَمْ قتيل

مَا فِيْه غَيْريْ حِزِيْنٍ عن همومي دَرَى

واحِسّ بالفَقْد لى من حَدّ ناَدَى (خليل)

واقول بَيْعود لِيْ هذا الإسِمْ يا ترَى

واصِيْح يا نايم اصْحَا ما بقَى لك قليلوْجَرْح قَلْبك مكانه مَا بَرَى.. مَا بَرَى