قَاْل (خَالِدْ إبِنْ فَيْصَلْ) مِقَاَلْة أمِيْر

والمقالات ما هي في سِمَاهَا سوَا

(كل حِرٍ إلَى ضاق انْتَهَضْ لِلْمِطِيْر

حَوْمته بِالسِّمَا سَاعَهْ لقَلْبه دوَا )

يا أمِيْر القوافي يا الخبير البصير

هَزِّني بَيْت شِعْرِكْ والمِعَنَّى ارْتِوَى

والخفوق الْمجَرَّحْ كاد والله يِطِيْر

عِقْب ما هو أسِيْرٍ قَصّ سِبْق الْجوَى

وانْتَهَضْ فَوْق يِكْفَخْ فَوْق رِجْم ٍ عِسِيْر

في مَعَالي الْمَعَالي ناشِرٍ ما طوَى

واسْفَرَتْ مِنْه رُوْح وْ شَافْ قَلْب ٍ ضريْر

وَاقْفَرَتْ مِنْه شَكْوَى وكِلّ لَيْل ٍ ضوَى

والْجِنَاحْ الْكِسِيْر اليوم أصْبَحْ جِبِيْر

وْكِلّ عَظْمٍ تِكَسَّرْ فِيْه عَادْ اسْتِوَى

من قِصِيْدِكْ يا (بُوْ فَيْصَلْ) يفِيْض الغدير

وازْهَرْ الصّبْح والطَّيْر المهاجِرْ روَى