رَدِّدِوْا يا اهْل التّهاني واهْتِفُوْا
عَاشْ (بُوْ رَاشِدْ) زبون المِسْتِجِيْر
مَاخِذْ النَّامُوْس عَ (الْمِفْتِيْ) وْ (ضَوّ)
تُوِّجَنْ بِالْفَوْز بِرمُوْز الأمِيْر
رَوَّحَنْ بالسَّيْف والْخَنْجَرْ خِذَوْا
وْ لِهْ عُوَايِدْ يَاخِذْ الشَّوْط الخطير
يَعْل سَبْقه دايم ٍ عَ ذَا النحو
والتَّهاني لِهْ من أعْمَاقْ الضمير
من كَرَمْ جُوْدِهْ عَلَى الْعَالَمْ ضَفُوْ
وْ بِهْ تُوَاضِعْ لِلْكِبِيْر وْللصِّغِيْر
إفْرَحَوْا بالسَّبْق حَضْره والْبَدُو
فَرْحَةْ النَّاموس والنَّصْر الكبير
إِنْ سِبَقْ (حَمْدان) بَاعَوْا وِاشْتَرَوْا
خُبْره الطيِّبْ كَمَا الْمِسْك العبير
كَالْحِيَا بِهْ مِ الشِّفَاقه رَحِّبَوْا
يُوْد وَسْمِي ٍ بِهْ الْبَيْدَا تِنِيْر
والمضَمِّرْ لَى عَلَيْهِنْ كَلِّفَوْا
يِنْذِكِرْ طارِيْه فِيْ الْجَمْع الغفير
خِبْرِتِهْ تِظْهَرْ مَعْ أصْحَابْ السموّ
في الخِتَامِيَّاتْ والْحَفْل المثير
وِانْ بِدَا شَوْط التَّحَدِّيْ رَكِّزَوْ
وْتَابِعَوْه مْتَابَع ٍ مَا لِهْ نِظِيْر
وْمِنْ يِشُوْفونه وِصِلْهُمْ حَرِّكَوْا
لَوْ بَعَدْ بَاقِيْ مِنْ الْوَقْت الكثير
(بو شهاب) مْضَمِّر ٍ فَذ ٍ كَفُوْ
وْلَى يِضَمِّرْهَا يِضَمِّرْهَا خبير
مِنْ شِمَقْهِنْ رَكْضِهِنْ كِلِّهْ رَهُوْ
رَوَّحَنْ مِثْل الظَّبِي ْ لَى مِسْتِذِيْر