مواجهة الرِّيْح

في حِبّ (حَمْدَانْ) كِلّ الشَّعْب (حَمْداني)

حَتَّى الّذي في حَيَاتِهْ مَا مَلَكْ ناقه

إنْ قال في باله الْمَيْدانْ مَيْدَاني

نشوف هِجْن الخَصِمْ في الرَّكْض مِعْتاقهلا الأوَّل اوَّل و لا الثَّانِيْ بقَى ثَانِيْ

أرْقام وأسْمَاءْ يَكْسِرْهَا عَلَى فاقه

ما هُوْ بْمِتْرَدِّدْ و لا هُوْ بْمِتْوَانِيْ

وِعْزومه عْزوم للنَّامُوْس مِنْسَاقه

والْقَاصِيْ أقْرَبْ له مْن مْنَافَسْ الدَّاني

على الوعوره وْ طَيّ الْبِعْد لِهْ طاقه

واللى يلقِّنْ خصوصه دَرْس مَجَّاني

مَفْرُوْض نَشْكِرْ كَرَمْه وْ طِيْبَةْ أخْلاقه

أحْيَانْ يِفْتَحْ لغيره دَرْب بالْعَاني

من باب تشجيعه لْمَنْ ضاقَتْ آفاقه

و اذا خسَر شَوْط هذا مَوْقِفْ إنْساني

يا كَم واحِدْ مذَاقْ الفوز ما ذاقه!

شِفْنا فِعِلْ (ضَوّ).. يوم الْكِلّ مِتْفَاني

تفَانَتْ وْ هِيْ لكَسْب السَّيْف تَوَّاقه

وِ تْقَدِّمَتْ كَنَّهَا مَوْكِبْ (نِهَيَّاني)

نِقْرَا النَّصِرْ والْفَخَرْ فِيْ وَجْه سُوَّاقِهْ

في سَيْرها هَيْبَةْ الْمِرْسِدْس الالماني

.. اللي بوَصْف الفخامه ما حَدٍ فاقه

لَوْ تَنْطِقْ تْقُوْل أنَا (حَمْدان) وَصَّانِيْ

أكُوْن مِثْله في وَقْت الجَدّ سَبَّاقه

(حَمْدان).. من جَرَّبْ مْنَافَسْته يْعَاني

لى واجَهْ الرِّيْح رِيْح يْشِعّ بَرَّاقه

وانا اشْهَدْ أنّهْ عَنْ أهْل الشِّعْر مِتْغَاني

لكِنّ مَدْحِهْ حِيَا في قْلُوْب عِشَّاقه

و اْلكِلّ يَدْعِيْ عَسَى النَّامُوْس (حَمْداني..)

حَتَّى الّذي في حَيَاتِهْ مَا مَلَكْ نَاقه