يا رَوْضَةْ العِشْق ظِلِّيْني

عَطْشان والشَّمْس مِلْتَهْبه

في حِيْرتي لا تخَلِّيْني

ضايِقْ والانْفَاسْ مِنْتَشْبه

وانتي ضيا النور في عيني

وانتي فضاءاتي الرَّحْبه

غَنَّيْت في الحِبّ تَلْحِيْني

إلاَّ الوَصِلْ قافيه صَعْبه

عِنْدِكْ صَبِرْ يوم تعطيني؟

عِنْدِكْ كَرَى ليل وانْعَسْ به؟

خَلّي الْعَنَا لا تحاتيني

والوَجْد له ضَجّه وْجلْبه

وان اقْبلَتْ فَرْحَةْ سْنيني

عِقْب المتاهات والغرْبه

نَذْرٍ عَلَيّ أبْسِطْ ايديني

واغْفِرْ خطا الصَّدّ والنَّكْبه

ما كِلّ ما صار يَعْنِيْنِيْ

وْلا كِلّ قَلْب ٍ أبَى كَسْبه

إلاَّ انْتي بْكِلّ ما فِيْني

أهْوَى تغَلِّيْك وافْرَحْ به!